Máis de 4.500 profesionais inscribíronse no rexistro de socorristas acuáticos de Galicia

Galicia pechou a tempada de verán con 4.485 profesionais inscritos no Rexistro profesional de socorristas acuáticos creado pola Xunta. A cifra, segundo trasladou a Xunta nunha nota de prensa, reflicte un incremento do 13 % con respecto a finais de 2023, cando figuraban 3.959 persoas inscritas. Do total, a maior parte son socorristas en instalacións acuáticas, con 2.309, seguidos de socorristas en espazos acuáticos naturais, con 873, e de socorristas en instalacións acuáticas e espazos acuáticos naturais, con 804.

Para o Goberno galego, o incremento de profesionais do socorrismo en Galicia demostra "o impacto positivo" do cambio de normativa realizado en 2023, fundamentalmente a través da nova vía de acceso que supuxo a realización dun curso de 240 horas e da apertura do desenvolvemento desta formación a entidades privadas. Así, neste ano rexistrouse un aumento de case o 40 % nos profesionais formados nestas entidades, con 300 persoas fronte ás 219 de 2023.

Pola súa banda, a Academia Galega de Seguridade Pública (Agasp) reforzou tamén a súa oferta formativa neste ámbito, con 12 cursos en 2024 fronte aos nove do ano anterior. A cifra de persoas aptas este ano foi de 248, 14 máis que en 2023. Aínda que a contratación dos servizos de vixilancia, rescate e salvamento en espazos acuáticos é unha competencia municipal, o Goberno galego destacou que "apoia a súa contratación e encárgase de regular a formación que deben reunir para prestar un servizo seguro e de calidade", así como para poder estar inscritos no Rexistro profesional de socorristas de Galicia.