A Iniciativa Galega pola Memoria rexeita o traslado a Madrid de fondos do Arquivo Militar de Ferrol

A Iniciativa Galega pola Memoria, rede na que se integran asociacións, fundacións e colectivos memorialistas de Galicia, trasladou a súa "enorme preocupación" polo traslado a Madrid dos fondos máis importantes do Arquivo Militar de Ferrol, o que considera que "suporía un golpe significativo á investigación e ás políticas de memoria" en Galicia.

Nun comunicado, o colectivo lembra que as causas e procedementos xudiciais do Tribunal Militar IV son fundamentais para a investigación e análise non só do golpe de estado, a posterior ditadura e a violencia xerada, senón tamén dos movementos sociais, obreiros e políticos en Galicia, desde o século XI ata os anos 60.

Por iso, considera un "prexuízo enrome" a intención da Subdirección Xeral de Publicacións e Patrimonio Cultural do Ministerio de Defensa de "afastar" estes fondos documentais do seu usuario natural, "o pobo galego".

"Persoas investigadoras e historiadoras, familiares de vítimas, xornalistas, estudando e profesorado das universidades galegas veríanse na obrigación de desprazarse a Madrid para ter acceso a unha documentación que xa estaba na súa terra, o que profundaría no centralismo que xa sofre Galicia desde hai séculos". O colectivo considera que o traslado, ademais de vulnerar a constitución, implicaría "unha vulneración manifesta da Lei de Memoria Democrática". 

Membros da Iniciativa Galega pola Memoria antes de comezar a rolda de prensa.