Advertencia de contaminación microbiolóxica no río Ulla
A análise revela posibles verteduras no punto de confluencia do Sar co Ulla, e recomenda seguimento continuado para evitar riscos aos ecosistemas.
Por Europa Press / Redacción | Santiago de Compostela | 09/11/2024 | Actualizada ás 20:54
A OPP 89 Parquistas de Carril e Cobre San Rafael presentaron, en colaboración coa Rede de Estacións Biolóxicas da USC (REBUSC), resultados da monitorización da calidade das augas do río Ulla.
Segundo a análise, os valores fisicoquímicos das augas indican unha "calidade moi boa" conforme á normativa vixente, e ningún dos metais disoltos analizados supera os niveis de referencia. Nas próximas semanas, a Estación de Bioloxía Mariña da Graña instalará unha terceira sonda para complementar as campañas de control que se realizan desde 2022.
Entre as conclusións, destácase que, aínda que non se detectaron riscos fisicoquímicos, si se observou unha posible contaminación microbiolóxica na zona de confluencia do Sar co Ulla, o que suxire a presenza de verteduras que requiren un seguimento continuado.
Por este motivo, o informe recomenda ampliar os estudos microbiolóxicos e biolóxicos augas arriba da localidade de Padrón e nos seus afluentes, co fin de detectar posibles impactos ambientais e asegurar a sostibilidade dos bancos marisqueiros da zona.
