Os Premios #youtubeiras pechan este venres a inscrición para a primeira edición que admite vídeos en TikTok
Por E.P. | SANTIAGO DE COMPOSTELA | 11/11/2024 | Actualizada ás 13:57
Youtubeiras, proxectos organizados polos servizos de normalización lingüística de dez concellos, do tres universidades e da Deputación da Coruña, co obxectivo de fomentar a creación de contidos dixitais en galego e con temáticas e formatos diversos, pecha este venres, día 15 de novembro, ás 23,59 horas o prazo de inscrición para a oitava edición dos seus premios.
Nun comunicado, a organización explica que a inscrición se debe realizar a través da web desta iniciativa, www.youtubeiras.gal, e que está aberta a todas as persoas maiores de 14 anos con canles de Youtube e/ou TikTok autoproducidos. No caso de concorrer persoas menores de idade, a inscrición incluirá a autorización da persoa titora legal.
As canles de participación que participen deberán ter a maioría de vídeos en galego e cumprir cos seguintes requisitos: contar como mínimo cun vídeo subido a partir do 15 de novembro de 2023 coa mención #youtubeiras; non ter restricións de privacidade; os títulos, as descricións e os subtítulos permanentes, no caso de existir, deberán estar en galego e os vídeos poden contar con subtítulos de activación opcional en Youtube noutras linguas.
Nesta convocatoria, os Premios Youtubeiras+ permiten por vez primeira que se presenten creacións en galego en TikTok. Deste xeito, o certame amplía o seu campo de acción e pasará a ter sete categorías de premios: canle de Youtube, canle de TikTok, creación de contidos, revelación, calidade lingüística, rede e Premio de público.
