Os galegos no paro non poderán rexeitar traballos que se adapten ao seu perfil ou serán excluídos das prestacións

O titular do Goberno galego, Alfonso Rueda, avanzou este luns que os demandantes de emprego deberán asinar un acordo polo que se comprometen a ter unha procura activa de emprego, o que inclúe "non rexeitar traballos que se adaptan ao seu perfil" nin tampouco cursos formativos.

Os que non cumpran, explicou, "serán retirados das listas de demandantes de emprego" e de "todos os dereitos que se outorgan por estar nestas listas". Así o sinalou na rolda de prensa posterior ao Consello da Xunta, que este luns se celebrou no municipio coruñés de Noia, e na que, a continuación, o conselleiro de Emprego, José González, detallou que esta medida trátase dunha cuestión "ética" e tamén de "eficacia".

"O obxectivo é claro e concreto: mellorar o funcionamento das oficinas de emprego e contribuír á inserción laboral dos galegos que están no paro e que sexan demandantes activos de emprego. Avanzamos nesa afinación de listas para prestar a cada persoa a atención máis adecuada para seguir traballando na consecución dun mercado laboral forte, dinámico e inclusivo", manifestou.

Reunión semanal do Consello da Xunta, este luns en Noia | Fonte: XUNTA