A folga da CRTVG denuncia o "malgasto" do diñeiro público en externalización de programas
Na decimosexta xornada, os convocantes volveron parar a emisión do programa 'O Termómetro'
Por Europa Press / Redacción | SANTIAGO DE COMPOSTELA | 11/11/2024 | Actualizada ás 17:26
A folga na CRTVG convocada polo Comité Intercentros volveu a provocar a paralización da emisión do programa 'O Termómetro', cuxa produción externalizada denuncian os folguistas e pon de exemplo da "mala xestión" da Corporación.
O paro deste luns (16ª xornada de folga) é o primeiro tras a entrada en vigor da ampliación do horario de folga en 45 minutos (desde as 11.30 horas ás 13.45 horas), que arrincaron o pasado 7 de outubro.
Reunidos unha vez máis ante as instalacións da Corporación, os folguistas volveron a denunciar a "incesante privatización dos contidos da radio e a televisión pública nos últimos 15 anos, cunha progresiva eliminación ou privatización de programas nos dous medios durante todo o mandato da actual dirección da CRTVG".
Durante a concentración, os traballadores simbolizaron co lanzamento de billetes, o "malgasto" de diñeiro público que supón a externalización, "que contribúe ao desmantelamento da CRTVG".
Aseguran que, no caso de 'O Termómetro', cada hora de emisión custa un 154% máis do que custaba A Revista.
A pesar da duración da folga, lamentan que a dirección se negase a dialogar, nin coas secretarías xerais dos sindicatos convocantes (CUT, CIG, UGT e CCOO), que solicitaron unha reunión co director xeral para mediar no conflito, nin coa mediación solicitada polo Comité Intercentros no Consello Galego de Relacións Laborais, que a dirección rexeitou o venres pasado.
Por contra, afirman, a dirección dedicouse a "tentar amedrentar" ao comité de folga, "acusándoo de presionar ao persoal para que secunde os paros ou de utilizar o megáfono no interior das instalacións".
A isto suman a decisión de Recursos Humanos de establecer a partir do 1 de xaneiro o crédito sindical horario recolleito no Estatuto de Traballadores, "pondo fin unilateralmente a un acordo en vigor na liña do existente en todas as administracións públicas".
Comunican tamén que este martes está prevista a celebración de asembleas para avaliar a folga e decidir o rumbo a seguir.
POSTURA DA CRTVG
A CRTVG, consultada por Europa Press, informou de que o seguimento da folga este luns foi do 13,6%, polo que, aseguran, "máis do 85% do persoal da CRTVG non secunda o boicot sindical contra o programa 'O Termómetro'".
Destacan ademais que a folga indefinida "apenas está sostida polo Comité Intercentros convocante". Segundo apuntan, a asemblea de traballadores na que se confirmou a continuación dos paros tivo unha asistencia dunhas 40 persoas sobre un total de case 1.000 traballadores.
Así mesmo, aseguran que a petición de cancelación do programa 'O Termómetro' non ten "ningunha base legal". Argumentan que esta mesma estrutura de programa é a que existe en Televisión Española e o resto de canles autonómicas.
"A mobilización sindical só busca o despedimento de traballadores e impedir que en Galicia se poida traballar nas mesmas condicións que no resto do Estado", afirman.
