Paulo Carlos López e Verónica M. Barbeiro liderarán Sumar Galicia
Foi a única lista presentada.
Por Europa Press / Redacción | SANTIAGO DE COMPOSTELA | 18/11/2024 | Actualizada ás 10:09
A Comisión Promotora do Movemento Sumar Galicia aprobou a única candidatura presentada para conformar a nova Coordinadora Nacional desta formación, unha lista encabezada por Paulo Carlos López e Verónica Martínez Barbeiro.
Deste xeito, a candidatura, integrada por 30 persoas titulares e 8 suplentes, será a única que se someta á asemblea xeral que se celebra o vindeiro sábado 23 de novembro en Santiago de Compostela, coa que culmina o proceso constituínte de Sumar Galicia.
Así, Paulo Carlos López postúlase para ser o secretario xeral, mentres que Verónica M. Barbeiro (portavoz de Sumar no Congreso desde a saída de Errejón) aspira a ser a presidenta da formación en Galicia.
Na candidatura que configurará a estrutura directiva de Sumar Galicia están, entre outros, o deputado Manuel Lago; o exconcelleiro da Coruña, Juan Díaz Villoslada; o exsecretario xeral de CC.OO.-Galicia, Ramón Sarmiento; ou a que foi portavoz no Congreso e logo aspirante á presidencia da Xunta, Marta Lois, que pecha dita candidatura.
