O Proxecto Triskelion, o "metanol verde" de Ferrol
Forestal do Atlántico cifra en 186 millóns de euros o investimento necesario deste proxecto que estima que creará 50 empregos en Ferrol.
Por Europa Press / Redacción | SANTIAGO DE COMPOSTELA | 18/11/2024 | Actualizada ás 20:50
Forestal do Atlántico comunicou que asinou acordos que "garanten a solvencia técnica" do proxecto de fabricación de metanol renovable Triskelion, co obxectivo de dispor da enxeñaría de detalle no primeiro trimestre do ano que vén e poder comezar as obras no segundo.
"Tras obter o acordo de subvención coa Comisión Europea, actualmente estamos pendentes de recibir outras axudas por parte do Goberno de España, que ata agora se solicitou sen éxito, imprescindibles para o desenvolvemento do mesmo", anunciou o seu director técnico, Iván Seoane, nunha xornada celebrada recentemente no Instituto de Enxeñaría de España (IIE).
A planta, que se situará nas factorías de Forestal do Atlántico na ría de Ferrol, producirá 40.000 toneladas anuais de metanol verde, que poderán incrementarse ata as 56.000 toneladas en fases posteriores.
A entidade cifra en 186 millóns de euros o investimento necesario e calcula que esta iniciativa permitiría a creación de 50 novos postos de traballo directos, 100 indirectos en fase de operación e 1.500 en fase de construción.
