Robots Lego para espertar o interese dos máis novos pola tecnoloxía
A Universidade da Coruña acolle o 20 de febreiro a segunda edición da FIRST LEGO League Galicia, unha competición de robótica para equipos de 10 a 16 e de 6 a 9 anos.
Por Galicia Confidencial | A Coruña | 10/02/2016 | Actualizada ás 10:00
Chega á Coruña a segunda edición da FIRST LEGO League Galicia, un programa que ten como obxectivo espertar na mocidade a curiosidade e o interese pola ciencia e a tecnoloxía.
Coa organización da Universidade da Coruña, e apio do Colexio Profesional de Enxeñaría en Informática de Galicia (CPEIG), ademais da colaboración de diversos patrocinadores, a FIRST LEGO League celebrarase o vindeiro día 20 de febreiro, na Facultade de Informática da Coruña.
A FIRST LEGO League concíbese coma un xogo competitivo sobre a robótica, mediante os famosos Lego como gancho, cos que cada equipo participante debe resolver un proxecto científico. A iniciativa pretende fomentar os valores do traballo en equipo, o da aprendizaxe, o da investigación, además de habilidades na resolución de problemas, a comprensión do papel da ciencia e a conciencia de contribuír nun aspecto construtivo á nosa sociedade.
Hai dúas categorías para participar: FIRST LEGO League, de 10 a 16 anos, e Junior FIRST LEGO League, de 6 a 9 anos.
O xogo por equipos da FIRST LEGO League consiste no deseño, construción e programación dun robot coa tecnoloxía LEGO® MINDSTORMS®. Os participantes deben superar unha serie de probas nun circuíto idéntico para todos os equipos participantes.
Outro desafío que deben levar a cabo é a realización do proxecto científico. Así, todos os participantes enfróntanse a un mesmo problema, que é proposto cada ano pola organización. Este ano o desafío é o "Trash Trek. Que se pode facer hoxe en día para mellorar á xestión dos residuos: recolección, clasificación, reutilización intelixente".
Cada equipo debe deseñar unha solución creativa para resolver este problema. Neste desafío, a creatividade amosada na solución é fundamental.
O equipo gañador do torneo representará a Galicia no campionato estatal, que este ano terá lugar durante os días 12 e 13 de marzo en Girona.
En paralelo ten lugar a FIRST Lego League Junior, para alimentar a curiosidade dos máis pequenos, de forma que estes se acheguen dunha forma divertida ao mundo da ciencia, a tecnoloxía, as matemáticas e a enxeñaría.
