A Xunta insiste no traspaso das competencias meteorolóxicas: "Non é por desmerecer á Aemet, pero Meteogalicia está máis preparada"

O presidente da Xunta, Alfonso Rueda, reiterou a petición do Goberno galego ao central para que transfiran as competencias en materia metereolóxica, "sen resposta aínda". Segundo esgrimiu ante os medios de comunicación tras visitar, acompañado pola conselleira de Medio Ambiente e Cambio Climático, Ángeles Vázquez, as instalacións de Meteogalicia, non se trata de "desmerecer" a capacidade e o traballo da AEMET, pero considera que, vistas as capacidades do servizo galego, "é moito máis lóxico".

"Temos un servizo meteorolóxico de moita calidade. E por tanto, con capacidade para determinar as alertas e, en función delas, activar os medios de emerxencia. Sei que esas alertas son dadas pola AEMET e insisto, non é cuestión, nin moito menos, de desmerecer as súas capacidades, pero creo que por capacidade de Meteogalicia, por número de medidores, que case triplica os que ten a AEMET, creo que é moito máis lóxico", defendeu. Confirmou que aínda non recibiron resposta, como tampouco o fixeron respecto da transferencia da xestión do litoral. En canto á meteorolóxica, lembrou que o conselleiro de Presidencia, Diego Calvo, volveu pedir as competencias no Parlamento galego, a finais de outubro, antes de que se producise a DANA en Valencia.

"Cando se fala de transferencia de competencias a Galicia sempre digo que estamos a pedir aquelas competencias que realmente poden ser de utilidade, que nos poden permitir desenvolver as nosas capacidades", remarcou Rueda, que avanzou que continuarán insistindo. Espera que esas transferencias se produzan "dentro da normalidade" e "dentro das obrigacións que ten o Estado, unha delas por sentenza do Tribunal Constitucional, cara á Comunidade Autónoma de Galicia". "Espero que sexa este mesmo ano", apuntou, engadindo tamén que ocorra o mesmo coas competencias en autoestradas.

VISITA A METEOGALICIA

En canto á visita a Meteogalicia, o presidente da Xunta quixo enviar unha mensaxe aos galegos de "tranquilidade" ante posibles catástrofes como a ocorrida coa DANA de Valencia. Así, destacou que teñen uns servizos meteorolóxicos "moi ben preparados, moi ben equipados, con capacidade para facer as alertas e os avisos". "Estamos preparados en todo o que se pode estar preparado. Loxicamente, nunca se pode falar dun 100 % de preparación fronte a todo tipo de situacións pero é certo que en Galicia temos feitos os deberes", incidiu, lembrando a recente actualización do Plan Inungal.

Alfonso Rueda e Ángeles Vázquez lanzaron un globo meteorolóxico acompañados por un grupo de escolares para, a continuación, visitar as instalacións da entidade. Alí, o presidente da Xunta reivindicou a Meteogalicia como unha "entidade científica de referencia a nivel europeo, que ofrece cada día información precisa, rigorosa e de calidade" ao conxunto da cidadanía e que conta coas ferramentas e recursos necesarios para predicir e anticiparse a posibles efectos adversos dos distintos fenómenos meterolóxicos.

Nesta liña, a Administración autonómica reforzará o próximo ano o programa de actuación ante efectos adversos co uso, entre outras ferramentas, da intelixencia artificial, mentres que profundará tamén na coordinación de Meteogalicia con outros organismos con implicacións na materia. A entidade colabora con Augas de Galicia a través do sistema Merlín para previr con tres días de anticipación en que zonas pode haber risco de desbordamentos de ríos como consecuencia das abundantes choivas.

O presidente da Xunta de Galicia, Alfonso Rueda, e Juan Taboada, de Meteogalicia, na sede da entidade, en Santiago | Fonte: XUNTA DE GALICIA