A praia das Catedrais, entre as mellores de España

A praia das Catedrais, situada en Ribadeo (Lugo), foi elixida como unha das mellores do Estado español, segundo recolle TripAdvisor, unha das páxinas de viaxes máis importantes do mundo.

Os viaxeiros e usuarios desta web foron os selectores destas praias cos seus comentarios e clasificacións ao longo dun período de doce meses, informa nun comunicado TripAdvisor.

A Praia das Catedrais ficou no sétimo posto de entre todos os areais do resto do Estado. Nos comentarios, os usuarios da páxina recomendan visitala en marea baixa, xa que o seu areal atópase nunha paraxe natural que, subliñan, permite facer magníficas fotografías.

Os Traveller's Choice Praias premian a 343 areais de todo o mundo, entre os que destacan seis praias españolas que se atopan entre as dez mellor valoradas. "Estamos encantados de ver que as praias españolas destacan a nivel internacional", subliña Branca Zayas, responsable de Comunicación de TripAdvisor en España, que agarda que esta listaxe sirva "para aqueles que estean a planear a súa próxima escapada".

Non é nin a primeira, nin será a última vez que a praia das Catedrais é noticia pola súa beleza. Hai uns meses, esta fermosa paraxe da Mariña lucense era elixida polos internautas do Estado como unha das "sete marabillas de España".

Así o recolle o libro "Sete Marabillas de España", que combina a paixón das viaxes e da fotografía para percorrer os espazos naturais elixidos a través das redes sociais por máis de 82.000 persoas.