Os migrantes axudan a Galicia a ter un saldo migratorio positivo en 2023

Galicia rexistrou un saldo migratorio positivo de 25.738 persoas durante o ano 2023, das que 23.337 procedían do exterior e 2.401, doutras comunidades autónomas, segundo a Estatística de Migracións e Cambios de Residencia (EMCR) publicada este xoves polo Instituto Nacional de Estatística (INE).

Este dato é inferior ao de 2022, cando Galicia contabilizou un saldo migratorio tamén positivo de máis de 27.000 cidadáns. Deste xeito, Galicia sitúase como a sexta autonomía cun saldo migratorio xeneral máis positivo. Así, por encima dela están Madrid (134.079), Cataluña (121.633), Valencia (113.129), Andalucía (60.385) e Canarias (31.598).

A maioría das persoas que gañou Galicia polo saldo migratorio en 2023 foron mulleres (13.583), fronte a un número de homes de 12.155. Ademais, todas as provincias galegas rexistraron un saldo migratorio positivo, tanto exterior como interior. Así, A Coruña gañou 11.647 persoas en 2023, das cales 1.552 viñeron doutras partes de España. Lugo sumou 4.143 cidadáns, sendo 346 doutras comunidades. Ourense fíxose con 3.337 persoas, 488 do resto de España. Así mesmo, Pontevedra sumou 6.611 cidadáns, 15 doutras comunidades.

DESPRAZAMENTOS ENTRE AUTONOMÍAS

En concreto, todas as comunidades presentaron saldo migratorio positivo co exterior en 2023. Os maiores déronse en Comunidade de Madrid (150.469), Cataluña (126.804) e Comunitat Valenciana (102.302). Pola contra, as comunidades con menor saldo migratorio co exterior foron A Rioxa (2.780), Cantabria (5.009) e Estremadura (5.735).

En canto aos saldos migratorios entre comunidades, os máis positivos déronse en Comunitat Valenciana (10.827), Principado de Asturias (2.814) e Castela-A Mancha (2.689). Pola súa banda, Comunidade de Madrid (-16.390), Cataluña (-5.171) e Andalucía (-2.570) presentaron os saldos interiores máis negativos.

REFUXIADOS DE SANTIAGO

Por outra banda, o delegado do Goberno en Galicia, Pedro Blanco, ratificou que traballan xunto ao Concello de Santiago para recolocar aos refuxiados de Santiago de Compostela aos que se denegou asilo. "Entre todos tratar de recolocalos", dixo, a preguntas dos xornalistas nun acto na Coruña no que incidiu no "constante e permanente contacto" co Concello de Santiago, ademais de traballar tamén as ONGs.

Respecto diso, confirmou que este mércores houbo unha reunión coa alcaldesa, Goretti Sanmartín, e a concelleira de Servizos Sociais sobre esta cuestión. Ademais, o delegado do Goberno en Galicia aproveitou para agradecer a colaboración deste municipio e outros para acoller a inmigrantes que están a chegar a Canarias e fixo un chamamento á colaboración ás comunidades autónomas, en concreto á Xunta. 

COLABORACIÓN DO CONCELLO

Pola súa banda, a rexedora compostelá manifestou que leva falando co delegado "todo este tempo" sobre a situación das persoas refuxiadas que se atopan en diferentes localizacións da capital galega, sobre todo, engadiu, cando se lles denegou o asilo a algúns deles e "quedaban nunha situación un pouco difícil". A preguntas dos medios este xoves, Sanmartín explicou que supón "un problema tamén para o Concello de Santiago", que quere "colaborar, axudar e botar unha man para ver como se facía esa xestión".

Así, detallou que mantivo esa reunión co delegado para ver "como se podía facer para que as persoas que finalmente se lles denegase o asilo" puidesen contar con "algún recurso", especialmente, en relación coa manutención e a vivenda. "Temos que garantir como administracións que todas as persoas refuxiadas, independentemente de que teñan un asilo ou non, estean en boas condicións e poidan ir conseguindo, paulatinamente, unha integración social", aseverou Sanmartín.