O PPdeG asegura que cumprirá os "prazos regulamentarios" para o ditame da comisión de investigación de contratos

O Grupo Popular no Parlamento galego cumprirá os "prazos regulamentarios" para elaborar e aprobar o ditame da comisión de investigación dos contratos da Xunta e do modelo concesional para construír o Hospital Álvaro Cunqueiro de Vigo. Aínda que non se marcará un horizonte temporal, si rexeita "atrasar" os trámites "como parece que pretende agora o BNG" co seu recurso ante o Tribunal Constitucional. Así o asegurou este xoves en rolda de prensa a secretaria xeral do PPdeG, Paula Prado, despois de que o mércores a comisión pechase a súa fase de comparecencias e cada grupo designase as persoas encargadas de redactar ese ditame, que posteriormente será discutido no pleno da Cámara.

A última sesión deste órgano, constituído por iniciativa do Bloque pero controlado polo PPdeG ao aprobar en solitario (coa súa maioría absoluta) a listaxe de comparecentes e de documentación, rexeitou unha proposta dos nacionalistas para estender os traballos, porque, din, "falta moito por investigar" debido ao "torpedeo" dos populares á comisión. Para a secretaria xeral do PPdeG, isto constata que o BNG "o único que buscaba" e que "busca agora" é "entorpecer as formas", avaladas por "os letrados" da Cámara, dunha comisión de investigación que "fracasou nos seus obxectivos" porque se "converteu realmente nunha comisión de difamación". "O único que buscaba o BNG e, mesmo, Pedro Sánchez desinflouse ao escoitar aos comparecentes", engadiu Paula Prado.

TOURIÑO FIXO UN "ENCARGO MOI CLARO"

Sobre as palabras do expresidente da Xunta Emilio Pérez Touriño, quen o mércores negou que o bipartito que el dirixiu entre 2005 e 2009 propuxese a colaboración público-privada para construír o Álvaro Cunqueiro, a dirixente popular lembrou que o seu goberno fixo "un encargo moi claro" ás consultoras Garrigues e PricewaterhouseCoopers (PwC), que apostaban por ese modelo. De feito, Prado lembrou que á comisión acudiu un representante de Garrigues que confirmou que o seu informe propuña a constitución dunha sociedade mixta con 90 por cento de capital privado para levantar o hospital, aínda que non se chegou a materializar. Ademais, o PPdeG cre que ao Bloque volvéuselle " en contra" a propia comisión, tendo en conta que "pediu celeridade" e o Grupo Popular "en ningún caso puxo ningún impedimento" para iso.

Non en balde, Prado criticou que a portavoz nacional do BNG, Ana Pontón, "segue sen responder" á pregunta que desde hai semanas formuláronlle desde as filas populares (o primeiro foi o presidente da Xunta, Alfonso Rueda), sobre se os nacionalistas son capaces "de cumprir cos criterios de calidade democrática que impoñen aos demais" e asegurar que non hai persoas próximas ao seu líder que se beneficiasen de contratos de administracións que eles mesmos gobernan. "Ese 'holding' nacionalista e apoiado polo PSdeG en diferentes administracións gobernadas por ambos tamén contratan baixo esa fórmula de contratos menores", subliñou Prado, para lembrar que dous cargos do BNG durante o bipartito (Rubén Cela e Alberto Souto) dixeron que "eran legais".

PONTÓN INSISTE NO "NERVIOSISMO" DO PP

Pola súa banda, a portavoz nacional do BNG, Ana Pontón, insistiu en que o "nerviosismo" que aprecia no PP é a proba de que o Bloque acertou "de pleno" na creación da comisión de investigación sobre a contratación da Administración autonómica e a construción do Álvaro Cunqueiro, que o mércores pechou a súa fase de comparecencias. Este xoves, a líder frontista manifestou, a preguntas dos xornalistas nunha rolda de prensa no Parlamento, que "a actitude" dos populares ao longo do desenvolvemento da comisión ratifica ao BNG na súa intención de pór "o foco" en "como se usan os recursos públicos" ante as "corruptelas" que, di, pon en práctica o PP desde a Xunta para "beneficiar" a empresas "amigas".

Neste sentido, avanzou que continuará co seu traballo de "analizar" a contratación pública da Xunta e que serán "firmes" ante as "corruptelas" despois de que os populares tratrasen, segundo Pontón, de facer da comisión "unha farsa" para "tapar as súas responsabilidades". Desta forma, incidiu en que irán "ata o final" para que "se coñeza a verdade" e non descartan "outras medidas a futuro" a maiores do recurso de amparo presentado ante o Tribunal Constitucional porque entenden que os seus dereitos como deputados foron "lesionados" pola actitude do PP durante a comisión que o pasado mércores abriu o período da redacción do seu ditame.