Por Europa Press / Redacción | OURENSE | 16/12/2024 | Actualizada ás 13:57
A Sala do Civil e o Penal do Tribunal Superior de Xustiza de Galicia (TSXG) confirmou a sentenza ditada pola Audiencia Provincial de Ourense na que se condenaba a un home a cinco anos de prisión por abusar sexualmente de maneira continuada dunha menor de idade, filla dunha amiga coa que compartía piso. Tamén confirmou, como o fallo orixinal, a súa absolución con respecto a outros delitos de natureza similar dos que se lle imputaba con respecto a outros menores.
Ademais da condena de cárcere, o home deberá manterse afastado polo menos 300 metros do domicilio da vítima, lugar de estudos ou calquera outro no que se atope a menor, así como de comunicarse con ela durante cincos anos. En concepto de responsabilidade civil, deberá pagar 4.000 euros polo dano moral causado. Segundo o relato de feitos probados que recolle a sentenza, que foi recorrida polo condenado e pola representación das acusacións, os feitos ocorreron "en días non determinados e en repetidas ocasións" entre os anos 2013 e 2018, cando o procesado compartía piso coa nai da vítima e encargábase tamén do coidado dos seus fillos. Durante estas datas indeterminadas, realizoulle diversos tocamentos.
Os maxistrados condenaron ao home ao considerar que a menor foi "rotunda e perseverante" no seu testemuño, xa que expuxo "con detalle explicativo a realidade do acaecido, de modo que a súa declaración é en todo coincidente co antes referido á súa nai, ante a Garda Civil, ás psicólogas, ao xuíz instrutor e, singularmente, ao longo da declaración prestada en xuízo oral". De feito, o tribunal destacou que "non concorre motivo de resentimento ou de animadversión que permita cualificar de inveraz a manifestación da vítima". Así mesmo, a proba pericial practicada serve para "afianzar a credibilidade do testemuño da menor". Con todo, a Audiencia absolveu ao home doutros feitos que se lle imputaban, ao non ver a proba "dotada do necesario rigor de convicción". Segundo os maxistrados, non existe "ningunha outra evidencia probatoria que ampare a pretensión punitiva".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.