O deporte xerou case o 1% do PIB galego en 2022
Por Europa Press / Redacción | SANTIAGO DE COMPOSTELA | 27/12/2024 | Actualizada ás 15:29
O valor engadido bruto xerado polo sector do deporte en Galicia no ano 2022 ascendeu a máis de 620 millóns de euros, segundo a Conta Satélite do Deporte de Galicia feita pública este venres polo Instituto Galego de Estatística (IGE). Este dato representa o 0,9% do PIB xerado Galicia nese exercicio.
Tal e como detallou a Xunta nunha nota de prensa, en termos de emprego, e segundo o mesmo estudo, o sector deportivo é responsable directo de 16.436 postos de traballo, o que representa o 1,4% do total da economía galega. A maior parte é asalariado, cunha remuneración próxima aos 515 millóns de euros.
A Conta Satélite do Deporte é unha actividade estatística de síntese cuxo obxectivo principal é proporcionar un sistema de medición económica do sector do deporte que permita valorar a súa importancia no conxunto da economía galega. Este proxecto xurdiu a iniciativa da Consellería de Presidencia, Xustiza e Deportes, que solicitou ao IGE a cuantificación da dimensión económica do sector.
Deste xeito, disponse de información da conta de produción, explotación e emprego. Tómase como referencia a Clasificación de Vilnius, restrinxíndoa aos denominados produtos e servizos característicos: aqueles que non existirían se non fóra polo deporte. Na metodoloxía desta actividade detállanse os códigos CNAE-09 incluídos na definición do sector e o procedemento de estimación en cada caso.
