A Xunta tamén fai seu a Castelao, "que une a todos", para celebrar o seu ano no 2025

A Xunta de Galicia declarou o ano 2025 como 'Ano Castelao' con motivo da celebración do 75 aniversario da súa morte e como "mostra de gratitude do pobo galego" a unha figura "singular" da cultura e política galegas. Así se determinou no Consello da Xunta celebrado este venres, o último do ano, no que se aprobou a declaración institucional en que se erixe a Daniel Alfonso Rodríguez Castelao como "unha das figuras máis coñecidas e recoñecidas por todos os galegos e galegas" que é capaz de "unir a todos".

Por iso, tal e como anunciou o presidente da Xunta de Galicia, Alfonso Rueda, na comparecencia de prensa posterior á celebración do Consello, a Consellería de Cultura preparou unha ampla programación para "enxalzar as importantes achegas do intelectual galeguista, tanto no campo da política como no da cultura".

Deste xeito, unha das accións máis relevantes será a recreación virtual de Castelao nunha exposición na Cidade da Cultura, que permitirá interactuar directamente con el, e na que tamén se reproducirá a súa voz. Será o mesmo Castelao que guíe aos visitantes nun percorrido pola súa vida, obra, achegas intelectuais e políticas e tamén creativas, a través dos seus debuxos. Esta recreación da figura e da súa vida no Metaverso será posible grazas ao proxecto Galiverso da Cidade da Cultura.

Así mesmo, a Xunta organizou, dentro da súa programación para difundir o legado cultural e intelectual do escritor rianxeiro, actividades educativas e de lecer para desenvolver en todos os centros escolares de toda Galicia.

A estas accións, súmaselle a edición, en colaboración coa Fundación Castelao e a Editorial Galaxia, do tres versións que deixou publicadas Castelao da súa emblemática peza teatral: 'Os vellos non deben de namorarse'. Será a primeira vez que leve a cabo a publicación simultánea dunha das obras máis populares do teatro galego, estreada en Buenos Aires en 1941.

Tamén levará a cabo a dixitalización, en colaboración co Instituto Padre Sarmiento, de toda a documentación descuberta sobre o proceso de aprobación do Estatuto de autonomía de Galicia de 1936, en que Castelao foi un dos partícipes directos

AXUDAS Á CREACIÓN AUDIOVISUAL

Por outra banda, o Consello da Xunta tamén autorizou este venres as bases e a convocatoria para 2025 das subvencións anuais á creación audiovisual galega para a promoción do talento neste sector, a través das que a Consellería de Cultura, Lingua e Xuventude investirá 176.000 euros en 11 novas curtametraxes e longos de dirección novel, todas elas en versión orixinal galega.