Santalices lembra ante o Apóstolo aos afectados pola DANA e reclama un sistema de financiamento que priorice ás persoas

O presidente do Parlamento de Galicia, Miguel Santalices, exerceu este luns como delegado rexio na tradicional Ofrenda de Translación dos restos do Apóstolo Santiago, na que pediu a intercesión do patrón de España polos que sofren violencia, os desfavorecidos, as vítimas das guerras e os danmificados pola DANA, á vez que dixo que é un "deber moral" dos gobernantes garantir a igualdade dos cidadáns e establecer un sistema de financiamento "que priorice ás persoas por enriba dos territorios".

Nunha extensa ofrenda, que pronunciou en galego e en castelán, Santalices tivo palabras de recordo para os afectados pola DANA, "outra traxedia natural que deixou vidas afogadas e fogares arrasados". "Nas nosas retinas quedaron prendidas as durísimas imaxes duns sucesos que a todos nos teñen que facer reflexionar e que non podemos deixar no esquecemento", dixo o delegado rexio. Por iso, expresou o agradecemento colectivo aos voluntarios, membros dos equipos de emerxencias e das forzas e corpos de seguridade que acudiron "aos lugares nos que o barro destruíu vidas, soños e proxectos de todas as idades".

Tamén agradeceu o "exemplo de solidariedade e xenerosidade" da sociedade cos afectados que, dixo, "permite manter a confianza e a esperanza nunha sociedade que a miúdo parece máis entregada ao individualismo e á frivolidade das imaxes deturpadas". Para quen desempeñan responsabilidades públicas, engadiu, "a recuperación da normalidade e a reconstrución" para que as vítimas "sintan a protección real e efectiva das administracións" debe de "ser unha obrigación".

PAZ FRONTE ÁS GUERRAS

Máis a gran escala, lamentou ante o Apóstolo o chegar a estas datas "sen que se apague o ruído das guerras que desposúen ás familias dos seus seres queridos e destrúen os seus fogares". "Seguen sendo moitas, demasiadas á vista de calquera, as persoas que ven obrigadas a fuxir do terror que invade os países como Ucraína ou Oriente medio, nos que a paz pola que rogamos convértese, por desgraza, nunha sorte de utopía", subliñou o presidente do Parlamento galego.

Por iso, pediu "paz e pola paz" en todos os territorios do mundo, así como "paz tamén nos fogares e nas familias, desterrando dunha vez e para sempre outra das secuelas do noso tempo: a violencia de xénero, tan repugnante como devastadora". O presidente do Parlamento tamén pediu ao Apóstolo saúde e por todos os enfermos, con "doenzas físicas ou mentais", así como polas súas familias, pola emigración galega, polo Papa Francisco e polo Rei, para que "continúe exercendo as súas funcións con rectitude", sen esquecerse de pedir a intercesión de Santiago Peregrino por "o ben común".

IGUALDADE, TAMÉN NO FINANCIAMENTO

Durante a súa ofrenda, o delegado rexio fixo un encomio á Catedral de Santiago, o "mellor exemplo do traballo colectivo", e á peregrinación que vertebrou durante séculos Europa, tendo en conta, especialmente, o mundo actual de "cambios profundos e acelerados pola impaciencia que caracteriza ao ser humano". Fronte a iso, dixo, "é importante que as administracións e cidadáns contribuamos en beneficio da solidez de todas as institucións que garantir a necesaria unidade e igualdade entre todos os territorios".

Por iso, reivindicou o Estado do Benestar e considerou que o servizo público "debe orientarse, sempre e por enriba de calquera obxectivo, á procura do ben común, para seguir construíndo unha sociedade de persoas libres e iguais, en dereitos e en deberes", unha sociedade na que todos, "con independencia do territorio" no que se resida teñan "garantido o acceso a idénticos servizos públicos". "Garantir a súa prestación e un sistema de financiamento equilibrado e non discriminatorio, no que se priorice ás persoas por encima dos territorios, constitúe unha obrigación legal, pero tamén un deber moral que a todos nos compete", engadiu.

VIVENDA E VÍTIMAS DE VIOLENCIA

Santalices non quixo esquecerse no seu discurso de ningunha das preocupacións actuais, como é o caso do acceso á vivenda, e apuntou a necesidade "urxente" de "facer efectivo o dereito constitucional á vivenda" e de "sumar esforzos" para "dinamizar unha oferta que facilite o acceso, especialmente dos máis novos". Fixo tamén un chamamento á atención a "os máis vulnerables": as vítimas de "calquera tipo de violencia", os máis novos e os anciáns. "E pedimos valentía, decisión e coordinación para encarar a secuela da violencia machista", engadiu.

No ámbito do progreso, e sen deixar de lado a saúde, Santalices fixo fincapé na súa ofrenda "ao avance exponencial que protagonizan as tecnoloxías" na actualidade, algo que "se traduce en novas oportunidades en todos os ámbitos", á vez que "se converte nun auténtico desafío necesitado de respostas audaces" en situacións como cando "o uso excesivo de dispositivos ameaza a saúde mental" de nenos e novos, as incógnitas do uso da intelixencia artificial ou a difusión de noticias falsas en redes sociais.

ARCEBISPO DE SANTIAGO: "É INACEPTABLE UTILIZAR AOS MIGRANTES OU REFUXIADOS COMO ARMA POLÍTICA"

O arcebispo de Santiago, Francisco José Prieto, pediu este luns, durante a Homilía do acto de Translación dos restos do Apóstolo, que os fieis lle "alcen a voz sen medo en defensa de quen está a sufrir", á vez que instou a "non perder a sensibilidade evanxélica" na "necesaria acollida e integración das persoas migradas". "É inaceptable utilizar aos migrantes ou refuxiados como arma política, cando xa acumulan dor polo desarraigamento e o abuso das mafias", engadiu.

A tradicional xornada de ofrenda ao Apóstolo Santiago antes de pechar o ano transcorreu baixo un radiante sol de inverno, que acompañou ás autoridades civís, culturais, sociais e militares que presenciaron o pase de revista ás tropas na Praza do Obradoiro. Posteriormente, a comitiva entrou en procesión á Catedral para a celebración da Eucaristía, na que pronunciou a súa ofrenda Miguel Santalices. Na súa Homilía de resposta, monseñor Francisco José Prieto lembrou a aqueles que sofren inxustizas, guerras, violencia, trata de persoas ou "falta dun traballo digno e seguro" e instou a acoller "desde a legalidade e a fraternidade" a refuxiados e migrantes.

Tamén tivo palabras de recordo para os damnificados pola DANA que "hai dous meses arrasou tantos pobos e tantas vidas", para as "dificultades de acceso á vivenda" que teñen novas e familias e para as "feridas que provocan as adicións, que tanto esclavizan a liberdade e a dignidade das persoas". Tamén pediu a intercesión do Apóstolo para eliminar a violencia contra nenos e mulleres e as guerras, que "arrasan coa verdade, a xustiza e a vida". O arcebispo compostelán lembrou a recente apertura do Xubileu da Esperanza, o Ano Santo Romano 2025, para reclamar "unha esperanza encarnada e comprometida que permita recuperar unha sociedade na que vivir sexa máis que sobrevivir".

Por iso, tomou a ofrenda ao Apóstolo para encomendar ao Santo Patrón a todos os españois e galegos, e ás familas, para que "sigan sendo berce de vida e de fe, onde todos, especialmente os nenos e anciáns, sentan coidados, queridos e consolados". Francisco José Prieto pediu tamén por "todos aqueles que exercen responsabilidades públicas, para que "dediquen os seus mellores esforzos ás esixencias do ben común e ao empeño de construír unha sociedade en paz, cimentada na verdade, a xustiza e a liberdade, sen extremismos nin exclusións, onde servir sexa sempre o horizonte da responsabilidade social, por encima das lexítimas diferenzas políticas".

Ante o Apóstolo, reclamou a bendición para o rei Felipe VI, para toda a familia real e para o oferente, a súa familia e os seus colaboradores. Para concluír, lembrou que, como dixo recentemente o Papa Francisco, a esperanza "converte en peregrinos aos camiñantes" no Camiño de Santiago, unha "metáfora espléndida e necesaria para os homes e mulleres llo noso tempo, para os europeos desta hora e os moitos que veñen doutros continentes". "Que, de novo, desde Santiago renaza aquela esperanza que nunca decae e que sempre nos sostén", engadiu.