Galicia roza os 7 millóns de viaxeiros ata novembro de 2024

Galicia roza os sete millóns de viaxeiros aloxados en establecementos turísticos (tanto hoteleiros como extrahoteleiros) nos 11 primeiros meses de 2024. Segundo destaca a Xunta nun comunicado, en total, os viaxeiros aloxados entre xaneiro e novembro foron 6.989.140, o cal supón un incremento do 1,9 % respecto da cifra do mesmo período en 2023. Estes viaxeiros realizaron máis de 13 millóns de pernoctacións, neste caso supón un aumento do 1,1 % fronte aos valores rexistrados ata novembro de 2023.

A Xunta remarca que os últimos datos coñecidos do Instituto Nacional de Estatística (INE) "confirman a desestacionalización con incrementos na demanda nos meses de febreiro (+3,8 %), marzo (+26,4 % por efecto da Semana Santa), maio (+11,1 %), setembro (+1,6 %) e novembro (+12,2 %). Remarca que houbo uns ingresos para o sector de máis de 413 millóns euros, cunha rendibilidade económica hoteleira que creceu un 7,1 %. Igualmente, o Goberno galego subliña que o turismo internacional continúa á alza, cun peso do 31 %, de forma que supera por primeira vez os catro millóns de pernoctacións.

MÁIS DE 82.000 PERNOCTACIÓNS EXTRAHOTELEIRAS EN NOVEMBRO

Os aloxamentos extrahoteleiros (apartamentos turísticos, albergues, casas rurais e cámpines) en Galicia rexistraron un total de 82.348 pernoctacións en novembro de 2024, un 19,7 % máis que no mesmo mes de 2023, segundo datos do Instituto Nacional de Estatística (INE). Por tipo de aloxamento, a repartición de pernoctacións é o seguinte na comunidade: apartamentos turísticos (35.492), albergues (27.423), casas rurais (12.773) e cámpines (6.660).

O maior incremento é o dos cámpines, cunha alza de case o dobre interanual (91,9 %). Séguelle a alza do 32 % en albergues, cámpines (10,7 %) e apartamentos (7,5 %). Mentres, os viaxeiros aloxados nestes establecementos extrahoteleiros foron 48.045, o que se traduce nun repunte do 22,1 % en comparación co undécimo mes de 2023.

DATOS ESTATAIS

En España, as pernoctacións en aloxamentos turísticos extrahoteleiros superaron os 6,8 millóns o pasado mes de novembro, un 4,6 % máis respecto ao mesmo mes de 2023. As pernoctacións de residentes incrementáronse un 8,2 %, mentres que as de non residentes aumentaron un 2,9 %. A estancia media situouse o pasado mes de novembro en 4,3 pernoctacións por viaxeiro.

En novembro de 2024, as pernoctacións en apartamentos turísticos aumentaron un 3,4 % en relación ao mesmo mes de 2023, mentres que as de cámpings incrementáronse un 3,7 %, as de turismo rural disparáronse un 18,8 % e as realizadas en albergues baixaron un 1,4 %. Durante os primeiros once meses de 2024, as pernoctacións en aloxamentos turísticos extrahoteleiros aumentaron un 3,3 % respecto ao mesmo período do ano anterior.