Traballadoras de residencias privadas de Ferrolterra denuncian precariedade laboral ante a Xunta

Delegadas da CIG nas residencias de maiores privadas da comarca de Ferrolterra entregaron escritos de denuncia en varios centros, reclamando melloras nas súas condicións laborais. As cartas, dirixidas ás direccións das residencias e á conselleira de Política Social, Fabiola García, destacan situacións de precariedade como os baixos salarios e a falta de persoal para atender os residentes. Segundo o sindicato, traballan con cargas laborais excesivas, especialmente en residencias con usuarios de alta dependencia, onde o tempo para realizar tarefas esenciais resulta insuficiente.

A CIG puxo como exemplo a situación na residencia DomusVi Ferrol, onde catro ou cinco xerocultoras atenden a 47 grandes dependentes en apenas dúas horas. Tamén advertiron da sobrecarga noutros departamentos, como limpeza, cociña e lavandaría, o que contrasta cos altos prezos que pagan os residentes, arredor de 2.500 euros mensuais por cuarto compartido. O sindicato censura que as empresas xestoras, moitas delas fondos de investimento, obteñen importantes beneficios mentres o persoal sofre penalizacións salariais por enfermidade e ten que traballar enfermo, poñendo en risco a saúde de todos.

Ademais, a CIG alertou sobre a crecente presenza de persoas con patoloxías psiquiátricas nas residencias de maiores, sen que o persoal conte coa formación adecuada para atendelas. Critican tamén a decisión de eliminar a obrigatoriedade de contar con persoal de enfermaría, o que agrava a situación. Ante isto, as delegadas demandan un convenio colectivo que recolla salarios dignos e condicións laborais xustas, e esixen á Xunta que deixe de privatizar os coidados, entregando a xestión a fondos voitres que precarizan o sector.