A corporación do Irixo debaterá o luns da semana próxima a segunda moción de censura do mandato

PP e PSOE do municipio ourensán do Irixo presentaron unha moción de censura contra a actual alcaldesa, Susana Iglesias, de Xuntos polo Irixo, quen xa accedera á alcaldía en agosto do pasado 2023 a través doutra iniciativa idéntica, xunto aos socialistas, coa que arrebataron o bastón de mando ao popular Manuel Cerdeira.

O debate e a votación desta nova moción de censura xa está convocado e celebrarase nun pleno extraordinario que será o vindeiro luns 13 de xaneiro ás 12.00 horas, coa socialista Rosa María Dalama como candidata á alcaldía, co apoio dos populares.

As vicisitudes na corporación do Irixo teñen a súa orixe no verán de 2023. En agosto dese ano Xuntos polo Irixo e o PSOE rexistraron unha moción de censura contra o Partido Popular, liderado por Manuel Cerdeira, que tomara posesión como rexedor o 17 de xuño do mesmo ano, pero en minoría co apoio de tan só 4 edís fronte aos 5 que sumaban Xuntos e PSOE.

Explicaban que levaban a moción a cabo por catro puntos fundamentais: que o alcalde non contaba con apoio maioritario; que iso non lle ía a "permitir gobernar en beneficio dos veciños"; a imposibilidade de constituír unha Xunta de Goberno local e, especialmente, unha situación municipal de "nefasta xestión do rexedor municipal e o seu grupo de goberno", aos que acusaban de "abandonar a atención dos veciños" do Irixo.

A moción de censura saíu o 29 de agosto, foi a primeira de toda Galicia tras as eleccións do 28 de maio e unha das primeiras en todo o territorio nacional. Con ese acordo, o PP perdeu unha Alcaldía que ostentaba desde que accedera ao poder en 1995 co anterior rexedor, Manuel Penedo, quen pasou de Centristas de Galicia ás filas do PP nese ano e mantívose no cargo ata o seu falecemento en 2019, cando asumiu a alcaldía Manuel Cerdeira.

"COMPORTAMENTO PERSONALISTA"

Menos dun ano tardaron en enfrontarse a outra tensa situación no concello ourensán, xa con visos dunha segunda moción de censura. En xuño do pasado 2024, un concelleiro do propio grupo de goberno votou en contra dos orzamentos e desde a oposición o Partido Popular rexistraba unha petición de pleno extraordinario, para que a alcaldesa presentase unha moción de confianza.

Á hora de votar os orzamentos Juan Manuel Villanueva, edil de Xuntos, votaba en contra, e ante a súa negativa non saían aprobados porque a coalición a formaban 2 concelleiros do PSOE e 3 de Xuntos, ante os 4 concelleiros populares. O edil acusou entón á alcaldesa de ter un "comportamento personalista" e sinalou que non recibiu información suficiente duns orzamentos que tachou de "nin sequera estar ben feitos".

Para Cerdeira non había entón sorpresa co sucedido no pleno. Aseguraba que a situación do concello "víase vir" por "falta entendemento" entre os membros do grupo de goberno, que non foran capaces de constituír a comisión de Goberno.

A rexedora, Susana Iglesias rexeitou someterse a unha cuestión de confianza aludindo a que "é unha competencia exclusiva da alcaldía e non unha cuestión que deba tomarse a treo" e remitíndose ao custo económico que tería levar a cabo un pleno extraordinario, "estimado en 400 euros" cos que "se podería beneficiar aos veciños".

Nese entón desde o Partido Popular pediron un estado de execución do orzamento para ver como está e "a partir de aí andaremos e veremos", dixo o que era exalcalde, Manuel Cerdeira. Medio ano máis tarde, o 27 de decembro de 2024, PP e PSOE presentaron unha moción de censura que se debaterá o vindeiro luns 13 de xaneiro.

"ACTITUDE DITATORIAL"

En declaracións a Europa Press o portavoz do PP local, Manuel Cerdeira, trasladaba que esta decisión parte de "a actitude totalmente ditatorial" da rexedora, nunha situación de minoría posto que actualmente conta con 2 actas de 9.

DESAUTORIZACIÓN DO PSOE

A decisión non estivo exenta de polémica porque, pola súa banda, a comisión executiva do Partido Socialista Ourense emitiu un comunicado no que subliña que esta moción de censura "é totalmente allea á formación, así como á agrupación local socialista de Irixo".