Rueda: "Necesitamos xente que veña aquí a traballar, xente que veña aquí a vivir"
Pide axilizar os trámites para os migrantes retornados.
Por Europa Press / Redacción | SANTIAGO DE COMPOSTELA | 09/01/2025 | Actualizada ás 12:48
O presidente da Xunta, Alfonso Rueda, destacou este xoves a aposta do Goberno autonómico por reforzar as políticas da Estratexia Galicia Retorna neste 2025, á vez que incidiu na importancia de axilizar os trámites para as persoas migrantes ou retornadas que queren iniciar un proxecto vital na comunidade: "Necesitamos xente que veña aquí a traballar, xente que veña aquí a vivir. É importante que entre todos facilitemos que esas persoas poidan vir a Galicia", dixo.
Rueda interveu na mañá deste xoves en Santiago nun almorzo coloquio con membros do corpo consular da Coruña e Vigo, en compañía do conselleiro de Presidencia, Xustiza e Deportes, Diego Calvo. Neste marco, o presidente galego destacou a importancia de traballar unidos cara ao exterior e lembrou que Galicia é "unha terra pequena" que "mira moito" máis aló das súas fronteiras, tanto a través das persoas residentes no exterior como como terra de acollida de migrantes e persoas retornadas.
En particular, fixo fincapé no esforzo que está a realizar a Xunta desde hai anos para potenciar as políticas de retorno, que permitiron que un total de 8.500 galegos do exterior volvesen á comunidade en 2023. "Son políticas co obxectivo de dicirlles a todos os galegos de orixe que aquí está a súa terra. Foi sempre, e se agora queren que sexa a súa terra de referencia estamos absolutamente encantados", destacou o presidente.
"A pesar da nosa vocación internacional, somos conscientes de que formamos parte de España", dixo Rueda, lembrando que as relacións internacionais son unha "cuestión de Estado" á que Galicia busca "achegar sempre desde a lealdade".ntar "a paz e a amizade entre os pobos".
