A autora dos incendios que cercaron Verín en 2022 acepta 3 anos de prisión e indemnizacións por un millón de euros

A muller acusada de causar en agosto de 2022 os incendios forestais que cercaron Verín durante varias xornadas admitiu os feitos e aceptou tres anos de prisión. A rebaixa, motivada por un informe que apunta que non era totalmente consciente dos seus actos, non implica, con todo, rebaixa nas indemnizacións que terá que enfrontar, que superan o millón de euros. A Audiencia Provincial de Ourense reservara seis días para a celebración deste xuízo, un dos máis importantes en chegar a esta sede xudicial polo volume dos danos rexistrados e a superficie afectada (case un milleiro de hectáreas), segundo apuntou a fiscal encargada do caso, Carmen Eiró, delegada en Galicia da especialidade de Medio Ambiente.

Non entanto, antes de entrar en sala todas as partes (Ministerio Público, Xunta de Galicia, Estado e defensa) chegaron a un acordo polo que a acusada viu rebaixada a súa pena. O Ministerio Público solicitaba inicialmente 6 anos de cárcere para a procesada, que ao final cumprirá 3. A rebaixa ten en conta unha eximente incompleta de responsabilidade penal xa que un informe psiquiátrico acreditou que padece un trastorno de alcoholismo crónico "que a inhabilita de maneira importante para o coñecemento das consecuencias dos seus actos e limita considerablemente a súa capacidade intelectiva e volitiva". Ademais, existe outro informe que traslada que a acusada padece un "trastorno límite" da personalidade. "Prendeu lume como puido facer calquera outra barbaridade", indicou a Fiscal.

"SENTIMENTOS ATOPADOS", DI A FISCAL

Durante a fase de instrución, a muller, que cumpriu xa 15 meses de prisión provisional entre setembro de 2022 e decembro 2023 por estes feitos, ofreceu "explicacións pouco ganduxadas", "versións exculpatorias" que non coincidían cos indicios recolleitos polos axentes da Garda Civil ou da UIFO da Xunta, entre eles o posicionamento do seu teléfono móbil, así como as declaracións das testemuñas. Todo iso era unha "proba indiciaria consistente" para a fiscal que, especializada en delitos ambientais, ten "sentimentos atopados" tras a sesión. "Fronte ao meu benestar persoal, de que igual celebrásemos o xuízo e conseguísemos unha condena, antes hai que defender a legalidade e, sobre todo, amparar o dereito á tutela xudicial efectiva", valorou.

Tamén destacou o traballo realizado por todos os corpos e forzas de seguridade que participaron na investigación e, en declaracións aos medios, subliñou que "fixeron un informe de causas marabilloso". Os dous incendios, orixinados os días 3 e 4 de agosto de 2022 no concello de Verín, supuxeron unha grande alarma ao queimar case un milleiro de hectáreas, nunhas condicións climáticas extremas e cunha vintena de focos dispersos, segundo o escrito da acusación fiscal.

INDEMNIZACIÓNS E PAGOS

O acordo reduce a pena de prisión e establece unha pena de multa de 2 euros ao día ao longo de 18 meses; pouco máis de 1.080 euros, pero non varía os termos da responsabilidade civil, que son cuantiosos. A autora deberá facer fronte integramente ás indemnizacións. Así, o importe dos danos e dos prexudicados foi taxado en 601.997.000 euros. Os gastos do operativo de extinción, que se desprazou por terra e por aire ata a zona de Verín, alcanza os 532.655,42 euros, que deberán ser pagos á Xunta de Galicia, así como 601,997 euros polos danos e prexuízos ambientais ocasionados.

Ademais, a Confederación Hidrográfica do Douro deberá recibir 27.525,73 euros polos traballos de corte de árbores e limpeza. En fase de execución da sentenza as indemnizacións aumentarán porque haberá que atender reclamacións de aseguradoras e particulares que aínda non foron cuantificados. Víronse afectados distintos bens, desde árbores e aveños ata maquinarias, naves e parcelas. O número total de afectados ascende a 59 persoas, que estaban chamadas a declarar.