Duplícanse nunha semana as consultas por gripe en Atención Primaria, pero a intensidade segue "baixa"
As predicións de Sanidade apuntan que, en próximas semanas, a onda subirá a nivel intermedio ou se manterá no baixo.
Por Europa Press / Redacción | SANTIAGO DE COMPOSTELA | 16/01/2025 | Actualizada ás 18:52
A onda de gripe en Galicia continúa coa súa tendencia "crecente" e a súa difusión "esparexida", coas consultas en atención primaria incluso duplicándose dunha semana a outra, ao crecer un 107 %. Con todo, a intensidade segue sendo "baixa", dado o moderado aumento dos ingresos (un 27 %) e a diminución das dispensacións de antigripais e test de antíxenos nas farmacias.
Neste contexto, a Consellería de Sanidade, que en pasadas semanas estimaba que o pico da onda de gripe podería chegar do 20 ao 26 de xaneiro (a próxima semana), considera agora que a intensidade variará entre continuar no nivel baixo ou subir a intermedio. Así o recolle o informe publicado este xoves pola Dirección Xeral de Saúde Pública, referido a a segúnda semana do ano, é dicir, desde o luns 6 de xaneiro ata o domingo 12. Neste período, o certo é que as consultas por gripe en atención primaria disparáronse un 107 % con respecto á semana previa. Aínda que a taxa relativa queda en 73,4 consultas por cada 100.000 habitantes, Saúde Pública aínda considera que a incidencia "continúa no nivel baixo".
O crecemento é notable en todos os grupos de idade, aínda que a taxa máis alta de consultas téñena os pacientes de 20 a 59 anos, con 98,6 por cada 100.000 habitantes. As máis baixas volven ser, de novo, as das franxas de idade que son o principal foco da campaña de vacinación: 32,1 consultas por cada 100.000 en pacientes de 60 a 79 anos; e 26,9 nos maiores de 80. Por áreas sanitarias, a de Ourense-Verín-O Barco de Valdeorras é a que anota a maior, con diferenza, con 96,6 consultas por gripe en atención primaria por cada 100.000 persoas. As restantes oscilan entre as 66,8 da área da Coruña-Cee e as 45,2 da de Ferrol.
OS INGRESOS SOBEN UN 27 %
No que respecta aos ingresos, se a primeira semana do ano subían un 55 %, a segunda só o fixeron nun 27 %, ao crecer os hospitalizados en 150 persoas. Así, a taxa quedou en 5,5 ingresos por cada 100.000 habitantes. Neste caso, as taxas máis altas si as rexistran os máis maiores: 21,1 hospitalizacións por cada 100.000 persoas maiores de 80 anos e 8 na franxa 60-79. De novo, a área de Ourense continúa á fronte con 8,5 ingresos por cada 100.000 habitantes, seguida de preto da de Ferrol, con 8,1. A terceira é a da Coruña, con 7,3 hospitalizacións por cada 100.000 habitantes; e a menor osténtaa Vigo, con 2,1. No que vai de tempada, os ingresos con gripe confirmada ascenden a 481 en total, a maioría con virus do tipo A.
Como contrapeso á subida das consultas e as hospitalizacións, o informe de Saúde Pública apunta que, entre o 6 e o 12 de xaneiro, as dispensacións de antigripais e probas de antíxenos descenderon de forma notable. Por tanto, tocarían teito na primeira semana do ano. En concreto, se do 30 de decembro ao 5 de xaneiro vendéronse un total de 1.973 antigripais, do 6 ao 12 de xaneiro dispensáronse 1.410, medio cento menos, cunha taxa de 62,88 por cada 100.000 habitantes. No caso do test de antíxenos, as vendas caeron de 953 a 761 unidades nunha semana, ata unha taxa de 35,82. O informe de Saúde Pública tamén recolle datos da covid-19, cun aumento do 18,4 % na taxa de consultas, que se mantén nun nivel baixo. Mentres tanto, o virus respiratorio sincitial en menores de 2 anos (causante da bronquiolite) segue caendo.
