Traballadores de Ence ameazan con folga por falta de investimentos

O Comité de Empresa da fábrica de Ence en Pontevedra advertiu á dirección da compañía pasteira que convocarán unha folga se non se atenden as súas demandas urxentes en materia de seguridade laboral, xestión de persoal con menor temporalidade e investimentos nas instalacións. "Temos unha necesidade extrema de investimento real e dunha xestión e realización efectiva do mantemento que leva postergando anos coa boa escusa do risco de peche político da factoría que tanto aproveitou a empresa", manifestou Omar Vázquez, secretario do Comité de Empresa que está integrado por sete delegados de Comisións Obreiras, tres de CIG e tres de UGT.

Nunha rolda de prensa celebrada este mércores, os representantes do persoal da fábrica de Lourizán informaron da situación de "conflito colectivo" que se vive en Ence tras meses de negociacións infrutuosas e máis de trinta denuncias ante a Inspección de Traballo. Advirten dunha situación "insustentable" que pon en risco a seguridade do persoal polo que demandan "un cambio urxente na xestión da dirección da fábrica e nas políticas de investimento da empresa", tanto por cuestións de seguridade e saúde para o persoal "como de viabilidade das instalacións da fábrica a futuro", explicou Omar Vázquez.

AUMENTO DA PRECARIEDADE

Nesta comparecencia lembraron que a fábrica de Lourizán é "unha industria química con maquinaria de risco" polo que "hai que tomar medidas de seguridade colectiva para que non se expoña aos traballadores". Aseguran que o estado das instalacións é "lamentable" polo que "pode derivar en calquera momento en graves accidentes". Sosteñen que "no día a día no traballo normalizouse a incidentalidade fóra de estatística".

O secretario do comité denunciou tamén a "falta de limpeza industrial", as instalacións "obsoletas" e manobras de operación "que causan unha precariedade, penosidade e exposición a riscos nunca antes vista na fábrica". A estas deficiencias súmanse "as carencias na roupa de traballo e falta de espazos dignos para o persoal". Ademais, o presidente do Comité, Santiago Cerqueiro, mostrou especial preocupación pola "alta rotación do persoal eventual" e a contratación "día a día" de traballadores novos que hai que formar para que despois só mantéñanse un ano na empresa.

Tamén apuntou que teñen a impresión de que a dirección "non cumpre na previsión das compras e pon en dúbida o compromiso cos produtores forestais locais e a súa estratexia de mercado", relacionando a falta de madeira coa retardación da produción en Pontevedra durante o último mes coa consecuente perda económica para o persoal, porque unha parte do seu soldo vai ligado á produción.

ENCE DEFENDE QUE A ROTACIÓN DE PERSOAL FIXO É CERO

En resposta ás afirmacións vertidas este mércores polo Comité de Empresa, Ence defende que a rotación de persoal fixo na súa planta de Pontevedra é cero e que o salario medio do persoal "dobra" a media do sector industrial, ademais de destacar que buscan "facilitar a conciliación entre vida familiar e persoal" cunha xornada inferior ás 37,5 horas. A compañía insiste en que a rotación de persoal fixo é cero, pero que para "abordar o gran incremento da taxa de absentismo ata situarse en niveis marca de preto do 9 % na actualidade", víronse obrigados a incrementar o persoal que realiza substitucións.

Explican que estes empregados reciben unha formación media de entre un e seis meses antes de asumir a titularidade do posto. Indican tamén que o salario medio do persoal da biofábrica é de preto de 57.000 euros, "o dobre da media do sector industrial en España". Engaden que a súa xornada laboral anual é de 1.648 horas, inferior ao equivalente ás 37,5 horas semanais. "Desta forma, a compañía aposta pola conciliación da vida persoal e profesional", remarcan.

Ademais, e como frutro da negociación do novo convenio colectivo da biofábrica, en 2024 incorporáronse 14 persoas indefinidas adicionais, derivado do incremento das vacacións do persoal a quenda e da concentración das mesmas no período estival. Subliñan tamén que a accidentabilidade está "moi por baixo" do sector industrial cun Índice de frecuencia en 2024 de 0,86, "máis de cinco veces por baixo do sector manufacturero español, situándoa como referente a nivel europeo en materia de seguridade".

En canto á subministración de madeira, aseguran que nin en Navia nin en Pontevedra hai problemas. "A empresa atendeu todos os seus pedidos e mesmo incrementou o stock de celulosa para atender a demanda dos clientes nos momentos que así o requiran. A fábrica de Pontevedra produciu un 16 % máis en 2024 grazas aos investimentos efectuados", argumentan.