A Xunta anima ás empresas a apostar polo sector militar e de defensa

A conselleira de Economía e Industria, María Jesús Lorenzana, animou este mércores ás empresas galegas a diversificar mercados e explorar as oportunidades de negocio que ofrece o sector da seguridade e a defensa. Lorenzana visitou as instalacións de Marine Instruments, onde subliñou que "para a Xunta é un orgullo que unha empresa galega como esta sexa punteira e estea absolutamente internacionalizada con establecementos en máis de 30 localizacións no mundo".

Durante a súa intervención, explicou que Marine Instruments aplica xa a tecnoloxía ao medio mariño a través de distintos produtos e servizos e puxo en valor que o seu éxito "está no talento" galego, pero tamén "en como souberon facer esa diversificación e internacionalización do produto".

Na súa exposición, a conselleira destacou que isto "é unha mostra de como a tecnoloxía e a innovación é parte fundamental para que as empresas poidan seguir crecendo e tamén para ver as posibilidades que ofrece a dualidade das tecnoloxías entre a parte civil e a parte de seguridade e defensa".

Ademais, a titular de Economía e Industria puxo en valor que precisamente niso é no que está a traballar a Xunta no sector aeronáutico, "tratando de que as empresas apliquen procedementos industriais duais" para mellorar a competitividade da industria, fomentar a súa internacionalización e impulsar a innovación empresarial.

Lorenzana anima ás empresas a explorar as oportunidades de negocio do sector da seguridade e a defensa.. XUNTA | Fonte: Europa Press