Campaña especial de vixilancia do transporte escolar nas estradas galegas

A Dirección Xeral de Tráfico (DGT) inicia este luns, e ata o vindeiro venres, día 24, unha campaña especial de control e vixilancia do transporte escolar nas estradas galegas. Durante esas xornadas, axentes da Agrupación de Tráfico da Garda Civil e policías locais, comprobarán que tanto autobuses como condutores cumpran coa normativa establecida, que inclúe, entre outras obrigacións, a necesidade de que os menores vaian acompañados por unha persoa debidamente cualificada nos desprazamentos.

Segundo explicou a Delegación do Goberno nun comunicado, a campaña ten "especial transcendencia" en Galicia debido á "gran extensión" de rutas de transporte escolar na comunidade. Galicia é a comunidade española con máis liñas de transporte escolar, ata 3.800 entre as públicas e as contratadas en todos os niveis educativos. Desta forma, segundo datos das autoridades educativas, en cada curso académico o servizo de transporte escolar acolle a máis de 90.000 alumnos e préstanse diariamente 7.000 servizos.

Esta semana intensificarán os controis preventivos, especialmente en estradas convencionais e en vías urbanas. O obxectivo é concienciar a pais, responsables educativos e condutores da necesidade de cumprir as normas establecidas. Neste sentido, realizarán controis de carácter administrativo sobre as autorizacións e documentos que deben ter os vehículos para a correcta prestación do servizo, verificará que as condicións técnicas e elementos de seguridade son os que esixe a normativa, así como os requisitos especiais que debe cumprir o propio condutor.

CAMPAÑA ANTERIOR

Na campaña do mesmo tipo realizada en xaneiro do pasado ano, os axentes de Tráfico da Garda Civil controlaron 324 autobuses escolares en Galicia, dos que 151 (46 %) foron denunciados con 231 denuncias formuladas. As irregularidades administrativas son as que maior número de denuncias xeraron, máis de 100. Entre as causas destas infraccións administrativas, destacan non dispor da autorización especial para realizar transporte escolar ou non subscribir un seguro de responsabilidade ilimitada.

Campaña da DGT en transportes escolares | Fonte: DGT - Arquivo