Unións Agrarias urxe solucións á Xunta para 500 granxas que se quedaron sen axudas dos plans de mellora

Unións Agrarias (UU.AA.) pide solucións á Xunta para 500 granxas que se quedaron sen axudas de plans de mellora. "A Consellería debe ser consciente que non ten sentido que haxa mozos que reciban unha axuda para incorporarse á explotación e logo deixalos sen apoio para que desenvolvan o seu proxecto empresarial, tal e como pasou nesta última convocatoria e que pon en serio risco a viabilidade destas incorporacións", expón nun comunicado. Por iso, chama a corrixir esta situación "de forma urxente" e que se atenda a todas as solicitudes de forma prioritaria. Remarca a importancia destes apoios para a modernización de explotacións e diferentes investimentos.

Así, Unións Agrarias subliña a importancia de que se aumente o orzamento para estas axudas, pois sinala que só se aprobaron 180 expedientes. "Non ten lóxica manter unha presión continua sobre as explotacións á hora de tramitar as axudas, sacar licenzas, etcétera, e obrigarlle a facer xa unha parte do investimento sen garantía de ter a axuda concedida. É preciso deseñar unhas liñas de axudas mantidas no tempo que teñan obxectivos prioritarios claros de sector e que eviten profundar na diferenciación de explotacións por tamaño", razoa.

Igualmente, opina que, tal e como xa se fixo no pasado cunha liña específica para a produción vexetal, "é necesario separar ademais a produción de leite e carne en liñas distintas para permitir acudir a estas liñas de axuda con criterios máis igualitarios entre explotacións", así como orzamento suficiente para cubrir todas as solicitudes posibles. Insiste na modificación das partidas orzamentarias dentro do Plan Estratéxico da PAC para aumentar a partida destas liñas de investimento moi demandadas e cun beneficio directo no medio rural.