O Goberno avisa a Altri: "Terá que cumprir o principio de non dano significativo ao medio ambiente"
Se non é así, non recibirá axudas públicas.
Por Europa Press / Redacción | MADRID | 06/02/2025 | Actualizada ás 21:02
A vicepresidenta terceira do Goberno e ministra para a Transición Ecolóxica e o Reto Demográfico, Sara Aagesen, advertiu este xoves de que o proxecto de Altri en Palas de Rei terá que cumprir "co criterio DNSH ou principio de non dano significativo ao medio ambiente" para recibir calquera tipo de axuda pública procedente do seu departamento.
Así o sinalou na Comisión de Transición Ecolóxica do Senado como resposta á senadora do BNG Carme da Silva, que instou a Aagesen a dicir que "non haberá recursos públicos para este despropósito ambiental", que supón "unha política industrial colonial de explotación de recursos enerxéticos, forestais, ambientais e agredir ao territorio de forma irreversible para o futuro".
Da Silva sinalou que "a macrocelulosa de Altri no corazón de Galicia vai contra a biodiversidade", para engadir que o proxecto aumentaría a superficie de eucaliptos, unha "especie altamente consumidora de recursos hídricos e que ataca enormemente á biodiversidade e ademais favorece os incendios terribles".
A vicepresidenta subliñou que, como corresponde á competencia do seu Ministerio, os recursos públicos do plan de recuperación para axudar ao proxecto "teñen que cumprir co principio de non dano significativo ao medio ambiente, o que chamamos o criterio DNSH". "Ata agora, e imos seguir facéndoo, en calquera axuda que sexa apoiada por este ministerio ou por outro, tense que cumprir con este principio. Imos velar por ese cumprimento, que non teñ a menor dúbida", reiterou á senadora do BNG. "En caso de dar axudas teriamos que mirar que se cumpre con ese principio de non dano significativo ao medio ambiente", engadiu.
