A primeira lei rexional europea de IA entra sen consenso na Cámara galega

A lei galega de intelixencia artificial (IA), que será a primeira dunha rexión europea nesta materia, superou o debate de totalidade na Cámara autonómica co rexeitamento do PP --Democracia Ourensana abstívose-- ás emendas de BNG e PSdeG, que tachan a norma de "pouco ambiciosa".

No pleno do Parlamento deste martes, o conselleiro de Facenda, Miguel Corgos, destacou que se busca o desenvolvemento dunha intelixencia artificial "ética" e "segura", "centrada nas persoas". Defende que se fai da "forma máis ambiciosa" no ámbito competencial galego. Remarca que a norma nace con tres obxectivos principais: dispor dunha IA segura e salvagardar os dereitos da cidadanía, mellorar a eficacia da Administración autonómica e consolidar a Galicia como rexión de referencia en Europa nesta materia.

Deste xeito, Corgos valora que "esta tecnoloxía permite tamén reducir tempos e liberar ás persoas que traballan na Administración de tarefas repetitivas ou de busca de documentación". "Estamos a falar dunha aposta polo futuro, pola innovación e polo benestar da sociedade", subliña.

NORMA

As actuacións da Administración galega e do seu sector público que impliquen o uso desta tecnoloxía deberán contar cun informe de proxecto de IA que, ademais de describir o seu funcionamento e características detalladas, incluirá unha avaliación de impacto relativo aos dereitos fundamentais das persoas, de acordo co modelo da Oficina Europea de IA.

A norma contará coa supervisión humana todos os procedementos administrativos que empreguen esta tecnoloxía sempre que sexa necesaria ou solicitada por calquera persoa implicada.

A lei regula a creación de novos órganos, como a Oficina de Intelixencia Artificial de Galicia ou o Consello Galego de Intelixencia Artificial, que velará pola prevención, detección e eliminación de riscos e resultados negativos; así como o inventario de sistemas de IA, que reflectirá o ciclo de vida de cada sistema.

Actualmente, a IA xa se emprega na Administración galega para cuestións como reducir ata unha terceira parte as lesións que poden pasar desapercibidas nunha lectura convencional das mamografías para a detección de cancro de mama, así como poder analizar un maior número de probas en menor tempo.

REXEITAMENTO DA OPOSICIÓN

O BNG e PSdeG defenderon senllas emendas á totalidade --Democracia Ourensana declinou intervir tanto neste debate como no posterior de textos lexislativos--. Por unha banda, Daniel Castro (BNG) lamenta a "falta de ambición que ten esta lei", aínda que avanza que o Bloque presentará "moitas emendas parciais" porque o Bloque cre na importancia de que a IA "pode mellorar" a vida dos cidadáns.

Julio Abalde (PSdeG) critica que o PP busca aprobar esta lei con "moita présa" e "moitas carencias" só para "cumprir un obxectivo propagandístico" en "lugar de aprobar unha boa lei". Ve o texto unha "oportunidade perdida" no canto de dar un "salto cualitativo" no desenvolvemento desta tecnoloxía. Entre outras carencias, apunta a só unha mención xenérica á lingua galega, obviar os dereitos da propiedade intelectual, falta de impulso do Cesga (Centro de Supercomputación de Galicia) e só citar "no preámbulo" á Axencia Estatal de Supervisión da Intelixencia Artificial (Aesia).