Desaloxan o instituto de Arzúa por un incendio iniciado nun dos baños

Alumnado, profesorado e outros traballadores do IES de Arzúa tiveron que ser evacuados este martes tras declararse un incendio nun dos baños do edificio. Tal e como confirmou o 112 Galicia, non houbo persoas afectadas por este incendio do que se tivo constancia sobre as 11.40 horas. Foi o persoal do instituto, situado na rúa do Castro, quen alertou á central de emerxencias dun incendio nun dos baños do inmoble. Ademais, nesta comunicación indicaban que estaban a evacuar o edificio e que non había persoas afectadas.

Ao ter coñecemento dos feitos, os operadores do Centro Integrado de Atención ás Emerxencias de Galicia (CIAE-112) deron aviso aos Bombeiros de Arzúa, á Garda Civil, á Policía Local e á Agrupación de Voluntarios de Protección Civil do municipio. Unha vez finalizadas os labores de extinción, os bombeiros detallaron que ardera unha papeleira e un dispensador de papel. Tamén caeron varios azulexos da parede na zona onde se iniciou o lume, mentres que algunha estancia do corredor viuse afectada polo fume, polo que tiveron que ventilar o espazo.

IES de Arzúa | Fonte: Páxinas Galegas