O accidente de Angrois será examinado por un Tribunal Europeo

O Tribunal Europeo de Dereitos Humanos someterá a exame "axiña que como sexa posible" a demanda coa que a plataforma de vítimas do accidente do tren Alvia ocorrido en Angrois  en xuño de 2013 segue reclamando que o Estado español faga unha investigación independente sobre o sinistro ferroviario.

No plano xudicial, tras unha instrución que durou anos e un macroproceso, a sentenza condenou tanto ao maquinista do tren como ao ex director de seguridade da empresa pública Adif, a ambos por unha imprudencia profesional grave. No relativo á comisión de investigación de accidentes ferroviarios (CIAF), esta realizou no seu día un informe que determina que unicamente houbo responsabilidade por parte do maquinista, debido ao exceso de velocidade, aínda que fixo unha serie de recomendacións para incrementar as medidas de seguridade na rede ferroviaria.

Por iso, para esixir unha nova investigación e "independente", a plataforma interpuxo unha demanda polo contencioso que é a que agora chega a Europa. Nun escrito do pasado 5 de febreiro, a secretaría do Tribunal Europeo de Dereitos Humanos informa á asociación de vítimas que "o caso será sometido a exame axiña que como sexa posible" e que "no momento oportuno" informará "as decisións adoptadas".

O tribunal tamén apunta que ten a intención de "axilizar ao máximo o proceso de exame das demandas" e que poderá solicitar información ao longo do procedemento. Un tribunal que, segundo subliñan as vítimas nun comunicado de prensa no que informan desta noticia, "admite menos do 5% das demandas presentadas", segundo datos que cita do Consello Xeral da Avogacía Española.

Varias persoas con carteis nos que piden unha investigación independente do accidente do Alvia | Fonte: Matias Chiofalo

"FACENDO HISTORIA"

Para o avogado da asociación, Antonio Benítez Ostos, director de Administrativando Avogados, "é un éxito absoluto que Europa decida revisar a actuación levada a cabo pola xurisdición española no que foi o accidente ferroviario máis grave da democracia".

"Esperamos obter unha resolución favorable que ordene ao Estado español a realizar unha nova investigación independente", destaca. "Dada a complexidade do asunto e a inexistencia de precedentes, que polo menos eu coñeza, considero que as vítimas do Alvia están a facer historia nesta loita xudicial", subliña.

Para a plataforma, o "obxectivo" de non levar a cabo esta investigación "é claro: evitar calquera tipo de responsabilidade política e contaminar á opinión pública para ocultar a verdade, as neglixencias e os incumprimentos normativos de seguridade".