Finaliza sen resultados por terceiro día consecutivo a procura dun veciño de Ferrol cuxo coche apareceu en Cabo Prior
Do mesmo xeito que nas xornadas previas, os labores desenvolvéronse por terra, mar e aire na zona de costa deste municipio.
Por Europa Press / Redacción | FERROL | 17/02/2025 | Actualizada ás 19:00
A procura dun home de 52 anos, cuxo vehículo foi localizado o pasado sábado na zona de Cabo Prior, en Covas, finalizou este luns e por terceiro día consecutivo sen que se puidese localizar ao home. En concreto, as tarefas iniciáronse á primeira hora da mañá con diversos efectivos de emerxencias e déronse por finalizada ás 18.00 horas. Na zona de Cabo Prior déronse cita varios axentes da Policía Nacional, ademais dunha embarcación do Grupo Especial de Operacións (G.E.O.) con mergulladores, así como a moto de auga dos bombeiros de Ferrol.
Estes mesmos efectivos tamén se volveron trasladar cun dos seus drons, que utilizaron para buscar na zona de costa ao desaparecido, tanto na auga como en zonas de moi complicado acceso desde terra. Pola súa banda, Salvamento Marítimo desprazou á zona, desde as 14.40 ás 15.50 horas, un dos seus helicópteros, o 'Helimer 206', que realizou unha procura sen resultado. Ademais, varios voluntarios de Protección Civil de Ferrol despregáronse pola zona.
