CCOO acusa a presidente e secretario do comité de empresa de Navantia Ferrol de reunirse coa dirección en segredo

A sección sindical de CCOO en Navantia Ferrol acusou ao presidente do comité de empresa, Juan Carlos Díaz (MAS), e o secretario, Marcelino Amado (CIG), de reunirse co presidente da empresa naval pública, Ricardo Domínguez, sen comunicarllo ao resto de sindicatos. Nun comunicado, CCOO asegura que o encontro se produciu o pasado xoves durante a visita do rei Felipe VI ás instalacións do estaleiro ferrolán e piden explicacións.

"Coincidindo coa visita do rei e da ministra, produciuse unha reunión entre o presidente de Navantia e o secretario e o presidente do noso comité de empresa", detallou, á vez que incide en que "as reunións entre a parte social e o presidente son lóxicas e desexables, pero non da maneira que se deron". Afirman que a parte social abordou "que tipo de acción reivindicativa" conviría facer ante esta visita. "Atopámonos coa desagradable noticia de que os principais responsables do órgano de representación dos traballadores estaban a reunirse pola súa conta co presidente de Navantia", concluíron.

Lamentan que o paso se dese sen coñecemento dos sindicatos que forman parte do comité de empresa e "obviando calquera tipo de acordo alcanzado no comité de empresa". Por último, desde CCOO aseguran que esta acción "xera certas dúbidas" e pregúntanse se o presidente e o secretario do comité "poden reunirse lexitimamente sen coñecemento do resto de delegados e delegadas".

Máis de 300 persoas do persoal de Navantia Ferrol e Fene cortan o tráfico ante a Delegación do Goberno, na Coruña | Fonte: Arquivo