A inflación industrial galega sobe un 3% en xaneiro polo encarecemento da enerxía

Os prezos industriais subiron en xaneiro un 3% en Galicia, en relación ao mesmo mes de 2024, segundo datos publicados este mércores polo Instituto Nacional de Estatística (INE), recollidos por Europa Press.

Esta cifra supón tres décimas máis que en decembro e é superior á media nacional, xa que no total de España a inflación industrial creceu un 2,6% o primeiro mes de 2025. En concreto, os bens de consumo mantiveron os seus prezos estables, mentres que os de equipo encarecéronse en Galicia un 0,5% e os intermedios baixaron un 0,3%. Foi a enerxía a que rexistrou unha subida do 10,3% nos últimos 12 meses.

A nivel estatal, os prezos industriais subiron un 2,6% en xaneiro en relación ao mesmo mes de 2024, taxa tres décimas superior á do mes anterior e a máis elevada desde febreiro de 2023, sempre segundo o INE. Co ascenso interanual no primeiro mes de 2025, a inflación do sector industrial suma tres meses consecutivos de incrementos tras encadear anteriormente 20 meses de taxas negativas.

A subida da inflación industrial en xaneiro foi consecuencia da evolución dos prezos da enerxía, que elevou a súa taxa interanual un punto, ata o 8,6%, polo encarecemento da produción de gas e do refino de petróleo.

Polígono industrial da Espiñeira, en Boiro | Fonte: Páxinas Galegas