O 86 % das prazas de "difícil cobertura" do Sergas quedarán cubertas en marzo

O conselleiro de Sanidade, Antonio Gómez Caamaño, asegurou que o 86 % das 423 prazas consideradas de "difícil cobertura" no Servizo Galego de Saúde (Sergas) quedarán ocupadas no primeiro trimestre deste ano. Así o afirmou en resposta a unha pregunta oral formulada pola deputada do PP Encarna Amigo durante o pleno do Parlamento de Galicia celebrado este mércores. Alí, Gómez Caamaño trasladou que, nestes momentos, están cubertas 271 destas 423 prazas de atención primaria, enfermaría e distintas especialidades en hospitais comarcais. A elas hai que engadir 94 do proceso de enfermaría especialista en saúde mental que, segundo Caamaño, formalizaranse "no primeiro trimestre do ano", co que o 64 % actual elevarase "a máis do 86 %".

OUROL

O conselleiro de Sanidade tamén tivo que responder a unha pregunta do deputado do BNG Daniel Castro sobre a situación do centro de saúde de Ourol, onde, segundo o nacionalista, "só hai médico seis días ao mes". Caamaño, como xa fixo na última sesión plenaria, acusou ao BNG de "percorrerse toda Galicia" para "buscar onde faltan médicos" co obxectivo de "atacar á Xunta". "Hoxe chegaron ata Ourol", engadiu. Neste sentido, afirmou que o centro de saúde de Ourol, que dá servizo a 700 usuarios, ten nestes momentos ao seu médico titular de baixa, o que "non significa" que "non haxa ninguén" porque o seu posto se cobre "coa prolongación de xornada" dos facultativos da PAC de Viveiro. Segundo Caamaño, o centro de saúde de Ourol ten "unha cobertura case completa" e "non hai demora" para conseguir unha cita, que pode solicitarse "para o día seguinte".

O conselleiro de Sanidade, Antonio Gómez Caamaño | Fonte: XUNTA