36.500 galegos con pensión non contributiva recibirán 218 euros

O Diario Oficial de Galicia (DOG) publica este martes o decreto que establece o pago dunha axuda ás persoas que perciben unha prestación non contributiva. A Xunta destina 8 millóns de euros a ingresar de oficio un complemento extra de 218 euros ao redor de 36.500 persoas beneficiarias de pensións de xubilación e invalidez nas súas modalidades non contributivas e as do subsidio de garantía de ingresos mínimos.

Este é un único pago anual que os beneficiarios reciben de maneira automática nas súas contas bancarias, sen necesidade de que o soliciten nin que fagan trámite algún. Deberán cumprir dous requisitos: ter residencia habitual en Galicia e estar en situación de alta en nómina a data de 1 de xaneiro de 2025.

Galicia é unha das poucas comunidades que concede, de maneira ininterrompida desde o ano 2008, esta axuda extraordinaria que non é obrigatoria, pois son os propios gobernos autonómicos os que deciden mantela.

Evolución do gasto en pensións contributivas en España ata febreiro de 2020 (Ministerio de Inclusión, Seguridade Social e Migracións). EPDATA