A regulación da intelixencia artificial en Galicia, presente no Comité Europeo das Rexións

O director xeral de Relacións Exteriores e coa Unión Europea, Jesús Gamallo, participou na segunda sesión da Comisión de Política Económica (ECON) do oitavo mandato do Comité Europeo das Rexións (CdR), onde as rexións e cidades debateron, entre outras cuestións, sobre política dixital e o uso da intelixencia artificial (IA) por parte das autoridades públicas e en cuxo debate, tal e como trasladou a Xunta, presentouse o estudo do CdR sobre a IA por parte das administracións locais e rexionais. 

O director xeral de Relacións Exteriores e coa Unión Europea, Jesús Gamallo, participa na segunda sesión da Comisión de Política Económica (ECON) do oitavo mandato do Comité Europeo das Rexións (CdR) | Fonte: XUNTA

Este documento, subliñou o Goberno galego, "define a Galicia como pioneira por ser a primeira rexión europea en lexislar sobre intelixencia artificial tanto para regular a súa utilización como para impulsala e promover o seu desenvolvemento". Segundo este estudo, trátase dunha iniciativa "de vangarda" que destaca "polo seu carácter innovador e potencial para a gobernación e a regulación desta tecnoloxía".

Ademais, a administración autonómica detallou que as rexións e cidades tamén definiron o seu programa de traballo para 2025, marcando como áreas prioritarias a competitividade da industria local e rexional, o impulso á transformación dixital para reducir as desigualdades, a resiliencia do mercado único para eliminar barreiras ou a simplificación dos trámites administrativos e burocráticos para facilitar o investimento.

Do mesmo xeito, destacou que tamén se debateu o 'Compás para a Competitividade' aprobado en xaneiro pola Comisión Europea, o primeiro gran marco lexislativo que orientará o traballo do executivo comunitario para abordar os retos aos que debe facer fronte para mellorar a súa competitividade, e sobre o marco financeiro plurianual para o período posterior a 2027.