Unha oficina virtual para a asistencia remota a vítimas de delitos comezará a funcionar este mesmo ano en Galicia

A Xunta porá en marcha este ano unha oficina virtual de asistencia ás vítimas de delitos, que lles permitirá contactar a través de videoconferencia cos equipos de profesionais que atenden estes centros. Diso deu conta este luns o conselleiro de Presidencia, Xustiza e Deportes, Diego Calvo, na rolda de prensa posterior á reunión semanal do Consello, na que se trasladou que o obxectivo desta iniciativa é ampliar o servizo que ofrecen actualmente as sete oficinas de asistencia a vítimas e facilitar unha atención personalizada e continua.

Ademais, porase en marcha un espazo web con toda a información sobre os servizos destes centros para ampliar a súa difusión entre a sociedade. A Xunta destacou que é unha das iniciativas do III Plan Tecnolóxico da Administración de Xustiza en Galicia. Senda 2025, que durante o pasado ano dotou ás oficinas de asistencia á vítima dun sistema de información, adaptado ás necesidades e requirimentos dos psicólogos e traballadores sociais que traballan nelas, que permitiu rexistrar case 1.200 expedientes e facilita a atención e seguimento das persoas.

Son datos do balance de execución do Plan Senda durante 2024, no que se avanza, tamén, actuacións previstas para este ano, como a renovación da plataforma de gravación de vistas, entre outras. Ademais, a nova versión do sistema eFidelius incorporará actuacións tecnolóxicas e novas funcionalidades que farán o seu uso máis sinxelo e reforzarán a seguridade. En 2024, a plataforma realizou máis de 114.000 gravacións, un 19 % máis que en 2023.

ACTUALIZACIÓN DO REXISTRO DE PARELLAS DE FEITO

Por outra banda, o Consello acordou este luns o texto do proxecto de decreto polo que se crea e se regula o Rexistro de Parellas de Feito para facilitar a tramitación e adaptala ás novas tecnoloxías e normativa. A Xunta aposta por unha maior funcionalidade e simplicidade, tanto para a cidadanía como para o persoal que debe aplicar a norma. Entre as novidades, está a de establecer a posibilidade de que as solicitudes nas distintas fases do procedemento se poidan presentar de forma telemática.

Deste xeito, a inscrición, modificación e cancelación de parellas de feito poderase facer consonte ás leis de procedemento administrativo común e da administración dixital de Galicia. Ademais, entre outras cuestións, a reforma permitirá darlle resposta ás principais incidencias recollidas nos rexistros e que teñen relación coa achega do certificado rexistral de fe de vida e estado, coa acreditación da veciñanza civil galega e coa falta de fixación temporal do tempo mínimo de convivencia.

LOITA CONTRA TRÁTAA E A EXPLOTACIÓN SEXUAL

Por outra banda, na súa reunión semanal, o Goberno galego deu luz verde a unha convocatoria de axudas dirixida a entidades de iniciativa social sen ánimo de lucro para financiar os programas que se desenvolven no ámbito da atención ás vítimas de trata e de explotación sexual. O orzamento desta orde de subvencións é de 630.000 euros, un 40 % máis que a anterior, e publicarase este mesmo mes de marzo no Diario Oficial de Galicia (DOG). Inclúe dúas liñas de subvencións: unha dela é para financiar programas de recuperación e integración sociolaboral das vítimas e a outra para apoiar campañas de inforamción, sensibilización e prevención. As contías máximas das achegas oscilarán entre os 70.000 euros e os 18.000 euros, en función do programa.