O Goberno aprobará un decreto sobre peaxes sen cambios para Galicia
A normativa trasporá unha directiva europea sen afectar ás autoestradas galegas
Por Europa Press / Redacción | MADRID | 14/03/2025 | Actualizada ás 19:16
O Consello de Ministros aprobará o próximo martes 18 de marzo un real decreto para adaptar á lexislación española a directiva europea que regula os criterios para calcular gravames e bonificacións polo uso das infraestruturas viarias. Segundo informou o Ministerio de Transportes, esta normativa non implicará a creación de novas peaxes nin aumentará as existentes, mantendo a política de bonificacións vixentes.
A nova regulación non afectará á situación actual das autoestradas galegas, incluíndo a AP-9, que seguirá contando coas bonificacións aplicadas nos últimos anos. Desde 2018, catro de cada dez quilómetros de autoestradas do Estado pasaron a ser gratuítos, o que supuxo un aforro de 1.400 millóns de euros para os usuarios.
A normativa introduce novos métodos de cálculo das peaxes, permitindo a internalización dos custos por emisións de CO₂ e conxestión, pero non afectará ás concesións de autoestradas xa en funcionamento. Para as vías xestionadas polo SEITT, establecerase a eliminación progresiva do sistema de viñetas para vehículos pesados antes de 2030, aínda que este sistema non está en uso en España.
BONIFICACIÓNS EN GALICIA
O Goberno confirmou que manterá os descontos en peaxes en varias autoestradas, entre elas a AP-9, que xa beneficiaron aos usuarios galegos con aforros superiores aos 330 millóns de euros desde 2018. Ademais, estase traballando para ampliar as bonificacións á AP-53.
A decisión garante que os condutores galegos non verán cambios nas súas tarifas actuais, mantendo as reducións existentes para usuarios frecuentes e determinados vehículos. Transportes insiste en que o decreto non introduce novas peaxes nin modifica os sistemas de tarificación actuais.
