Martinho obriga a suspender as actividades no mar en Galicia este sábado
A costa galega agarda ondas de ata oito metros, fortes ventos e posibilidade de neve a partir dos 800 metros de altitude
Por Europa Press / Redacción | SANTIAGO DE COMPOSTELA | 22/03/2025 | Actualizada ás 10:00
A Axencia Estatal de Meteoroloxía (AEMET) activou para este sábado, 22 de marzo, unha alerta laranxa por temporal costeiro en todo o litoral galego, con previsións de ondas de entre seis e oito metros e ventos de forza 8, que poden alcanzar os 74 km/h. A situación adversa comezará na madrugada do venres ao sábado no litoral de Pontevedra e o suroeste da provincia da Coruña, estendéndose ao longo do día ao resto da costa coruñesa e á Mariña lucense.
A Xunta de Galicia notificou esta alerta aos concellos costeiros, deputacións, servizos de Protección Civil, clubs náuticos e outras entidades, recomendando extremar as precaucións en calquera actividade relacionada co mar. Así mesmo, a Secretaría Xeral para o Deporte anunciou a suspensión de toda a actividade deportiva federada no mar ao longo da xornada do sábado.
Desde o Goberno galego tamén se lembra a importancia de manterse afastado das zonas próximas ao mar, como paseos marítimos, diques ou zonas portuarias, para evitar riscos derivados do impacto das ondas e do vento.
Segundo Meteogalicia, a borrasca 'Martinho', situada no Cantábrico, deixará en Galicia un corredor de ventos do norte que introducirá aire frío, dando lugar a chuvascos frecuentes, acompañados nalgúns casos de treboadas e sarabia. A cota de neve baixarase desde os 1.200 aos 800 metros durante a tarde.
As temperaturas tamén experimentarán un descenso lixeiro. Nas principais cidades galegas, a mínima esperada será de 3 graos en Lugo, mentres que a máxima alcanzará os 15 graos en Vigo. O vento soprará do noroeste, con especial intensidade nas zonas costeiras.
Ademais, Meteogalicia activa un aviso amarelo por neve nas zonas montañosas das provincias de Ourense e Lugo, onde se poderán acumular máis de cinco centímetros de neve por riba dos 1.000 metros.
As autoridades insisten en seguir as recomendacións oficiais e consultar a evolución do tempo a través dos canles de información habilitados, xa que as condicións meteorolóxicas poderían afectar tamén á mobilidade e á seguridade nas estradas de montaña.
