A Xunta destina máis de nove millóns a promotores para construír vivendas protexidas
Por Europa Press / Redacción | SANTIAGO DE COMPOSTELA | 21/04/2025 | Actualizada ás 18:00
A Xunta de Galicia destinará 9.540.000 euros a unha nova convocatoria de axudas a promotores inmobiliarios para a construción de vivendas protexidas en aluguer e venda. Así o avanzou o presidente do Goberno galego, Alfonso Rueda, este luns na rolda de prensa posterior á celebración do Consello da Xunta.
O obxectivo da convocatoria é "incentivar aos promotores públicos e privados a construír inmobles que contribúan a reforzar o parque público residencial de prezo accesible, tanto para aluguer, como para a compravenda". A Xunta lanzará este mes de abril a nova edición de subvencións, a terceira, para a promoción de vivendas para aluguer, aloxamentos temporais, e outras modalidades residenciais tipo covivenda (cohousing), vivendas interxeracionais e modalidades similares de nova construción ou procedentes da rehabilitación.
Nun comunicado explican tamén que a estes incentivos sumarase, na mesma convocatoria e con fondos propios da Xunta, a liña de axudas de promoción de vivendas protexidas de nova construción ou procedentes de rehabilitación, que nesta a súa segunda convocatoria proponse destinar á venda.
En ambas as modalidades, poderán ser beneficiarios destas axudas aquelas empresas que teñan no seu obxecto social a promoción de vivendas de nova construción ou procedentes da rehabilitación e as cooperativas de vivendas en réxime de autopromoción ou autoconstrución, que cumpran os requisitos previstos nas bases reguladoras.
Así, o Goberno galego destinará un orzamento autonómico de 4.900.000 ao programa dirixido á promoción de vivendas protexidas de nova construción ou procedentes da rehabilitación, cuxo prezo máximo de adquisición da vivenda será o previsto na cualificación definitiva. Ademais, na mesma convocatoria, a Xunta reserva 4.640.000 euros, con fondos finalistas do Estado, ás axudas á promoción de vivendas e outras modalidades residenciais que se vaian a destinar ao aluguer ou ceder en uso por un prazo de, polo menos, 20 anos.
A contía máxima da axuda determinarase en función da modalidade da axuda que se solicite. No caso das vivendas de aluguer, a cantidade máxima de subvención non poderá superar o 50 % do investimento da actuación, cun límite máximo de 50.000 euros por vivenda.
