Miranda (BNG) en defensa de Groenlandia: "Como Galicia, ten dereito a decidir sobre o seu futuro"
Lembra que nas eleccións do pasado 12 de marzo.quedou claro que "Groenlandia non se vende*.
Por Europa Press / Redacción | SANTIAGO DE COMPOSTELA | 21/04/2025 | Actualizada ás 19:06
A eurodeputada do BNG, Ana Miranda, participa desde este luns e ata o xoves nunha visita a Groenlandia do grupo Verdes-Alianza Libre Europea do Parlamento europeo, grupo no que está integrado o Bloque.
O obxectivo, segundo informa o Bloque nun comunicado, é o de coñecer de primeira man a situación do pobo de Groenlandia "nun momento de tensión xeopolítica no que están en xogo a súa soberanía e os seus recursos naturais". "Desde o BNG pensamos que, igual que os galegos e as galegas, os groenlandeses teñen dereito a decidir sobre o seu futuro e os seus recursos", defendeu Miranda.
Manifestouno en referencia ao "risco de espolio que vive Groenlandia na tensión xeopolítica actual" e que, agregou, Galicia "sofre desde hai anos en cuestións relacionadas coa megaminería, os macroparques eólicos ou o afán do Goberno do PP de instalar a macrocelulosa de Altri, así como a nova ameaza da explotación de materias primas críticas".
"Como dixo o pobo de Groenlandia nas pasadas eleccións do 11 de marzo, Groenlandia non se vende", subliñou a eurodeputada galega. Nesta delegación ao País Ártico participan as dúas eurodeputadas --de Galicia e Cataluña-- e o eurodeputado do País Valenciá da Alianza Libre Europea (ALE), ademais doutros eurodeputados de Italia, Dinamarca, Francia, Alemaña e Países Baixos do grupo parlamentario.
Como integrante desta delegación, Ana Miranda manterá diversos encontros, entre os que destacan as reunións dos diferentes ministros do goberno de Groenlandia, con membros do Parlamento groenlandés, co Xefe de misión da UE, así como colectivos defensores do medio ambiente e representantes da sociedade civil sobre dereitos humanos e dereitos do pobo inuit. Ademais, tamén se reunirá con representantes do sector pesqueiro.
