Reactivada a circulación ferroviaria en Galicia tras máis de 24 horas sen servizo
O terrritorio galego foi o último en ser activado por Renfe.
Por Europa Press / Redacción | SANTIAGO DE COMPOSTELA | 29/04/2025 | Actualizada ás 17:07
Renfe informou de que o tráfico ferroviario recupérase, aos poucos, en Galicia. O primeiro convoi en circular foi un dos que realiza o traxecto Santiago de Compostela - Vigo. Comezan así a renovarse as circulacións Avant e Media Distancia, así como as de AVE e Longa Distancia, con trens programados xa para esta tarde. A galega foi unha das últimas circulacións en recuperarse na península desde que este luns o 'apagamento eléctrico' rexistrado na península paralizase o transporte ferroviario por completo.
O propio ministro de Transportes, Óscar Puente, ratificou a noticia cunha mensaxe en redes sociais, onde destacaba que o transporte ferroviario ía recuperando a normalidade coa reactivación dos servizos en Galicia e o Corredor Mediterráneo (Euromed entre a Comunidade Valenciana e Cataluña). Apuntaba tamén que as Proximidades de Madrid operan ao 100% e que os Rodalíes de Cataluña seguen en proceso de recuperación, incrementando aos poucos o servizo.
ANULACIÓN DE INFRACCIÓNS POR NON USAR AS PRAZAS RESERVADAS
Por outra banda, Renfe anulará as supostas infraccións cometidas polos viaxeiros habituais con bonos recorrentes por non usar as prazas reservadas durante o día de onte e hoxe. Algúns usuarios recibiron unha comunicación do operador na que di detectar un incumprimento das condicións de utilización do abono bonificado, que inclúen medidas penalizadoras por non viaxar nos asentos reservados cos bonos gratuítos.
Con todo, trátase dunha mensaxe automatizada enviada polo sistema que xestiona as condicións dos abonos, segundo explicou Renfe. Desta forma, estes usuarios non se verán penalizados, xa que non usaron a praza porque non puideron, ao non haber trens este luns e ao seguir a rede con disrupcións durante este martes. "Todas as persoas que recibiron esta comunicación non serán penalizadas. Trátase dunha mensaxe automatizada enviada polo sistema que xestiona as condicións dos abonos. Renfe anulará as infraccións de onte e hoxe", explica a compañía.
