Arriva compra Autos Carballo e Santiaguesa Metropolitana e consolida a súa posición en Galicia
A empresa de autobuses contará con 250 persoas en equipo e un total de 204 vehículos e unha facturación en torno aos 17 millóns de euros.
Por E.P. | SANTIAGO DE COMPOSTELA | 14/10/2016 | Actualizada ás 11:32
A compañía de transportes Arriva Noroeste adquiriu as empresas Autos Carballo (Aucasa) e Santiaguesa Metropolitana, co que "consolida a súa aposta por crecer en Galicia", unha comunidade na que opera dende hai máis de 15 anos.
Diso deu conta a través dun comunicado, no que indicou que os 43 empregados das dúas sinaturas carballesas pasan a formar parte do Grupo Arriva, que agora suma 69 autobuses máis.
Con estas incorporacións, Arriva Noroeste contará con 250 persoas en equipo e un total de 204 vehículos, mentres que as previsións da súa facturación global se situarán en torno aos 17 millóns de euros.
Autos Carballo e Santiaguesa Metropolitana ofrecen na actualidade servizo regular urbano, interurbano e discrecional, así como transporte escolar na provincia da Coruña, e a súa presenza singularmente céntrase na bisbarra de Bergantiños.
En concreto, Aucasa opera a liña que conecta Santiago con Carballo, Malpica, Laracha e Camariñas; mentres que Santiaguesa Metropolitana dá servizo a Baio, Vimianzo, Camariñas e a capital galega.
