Noriega alerta dunha campaña contra as mareas e apoia que o seu nº2 non dimita

O alcalde de Santiago apoia a decisión de non dimitir do seu número 2. Martiño Noriega vai un paso máis alá e denuncia unha campaña de acoso contra as mareas.

O tenente de alcalde está sendo investigado pola Xustiza en relación a sancións a locais de ocio nocturno. O concelleiro de Espazos Cidadáns Jorge Durate renunciou a parte das súas competencias -as relacionadas co caso- pero di que non dimitirá. Duarte, acusado de prevaricación administrativa, argumenta que o código ético de Compostela Aberta só obriga a dimitir se a acusación implica o suposto enriquecemento dun cargo público, que non é o caso.

Por vez primeira diante da prensa, 24 horas despois de que saltase o caso, Martiño Noriega mostrou o seu apoio sen fisuras a Duarte. Iso si, informou que a Xunta de Goberno acordou que as competencias de sancións e concesións de licencias pasen ao concelleiro Xan Duro Fernández, unha transferencia que o propio Duarte xa solicitara onte.

Noriega cre que Duarte deu todas as explicacións necesarias inmediatamente. Tamén argumenta que non se trata dun caso de corrupción. 

Retirada de competencias

Ademais, o líder de Compostela Aberta asegura que levan “ano e medio” sufrindo unha campaña porque as mareas supoñen “unha ameaza política para os intereses de determinados sectores económicos”. O edil insistiu en que “a honestidade é o noso valor principal” fonte aos intereses ocultos en para que as políticas das confluencias non saian adiante. Para el o caso implica certa “perda da inocencia” e a constatación de que as mareas non compiten nun campo de xogo equitativo. O alcalde pregúntase tamén de onde saíu a denuncia, algo que di descoñecer. 

O alcalde aproveitou a súa comparecencia para "ratificar a confianza de todo o equipo de goberno no concelleiro Jorge Duarte". Martiño Noriega reiterou que o caso dos expedientes a locais de hostalería atópase no momento das dilixencias previas, e o concelleiro de Espazos Cidadáns prestará declaración como investigado despois de telo solicitado el mesmo por escrito ante a Fiscalía, tal e como explicou tanto nas súas roldas de prensa de onte para falar deste asunto como na súa comparecencia no Pleno, a petición propia.

 

Valoracións do PP local e Feijóo

No principal partido da oposición, o PP, tiran con bala. Se ben onte os conservadores limitábanse a recordarlle á marea os seus compromisos, hoxe o edil Alejando Sánchez Brunete subiu moito o tono. Sen citar a palabra “dimisión”, o conservador indicou que “cómpre a asunción da máxima responsabilidade política tanto pola gravidade das irregularidades como en función da palabra dada”. A Noriega e Duarte cualificounos de ‘trileiros’ por non supostamente non cumplir o código ético. Para el a área do Goberno está convertido nun “alcazar de irregularidades e desvergoña”.  

O seu superior, Alberto Nuñez Feijóo foi moito máis moderado. O presidente da Xunta acusou eso sí a Compostela Aberta de fariseismo e pediulle que actúen con “prudencia” en todos os casos, non só nos que os tocan a eles.

O PSOE denuncia falsas leccións de moralidade

Dende o PSOE seguen sen reclamar a dimisión de Duarte. Non por iso Paco Reyes, voceiro local, deixa de facer sangue. “Compostela Aberta enganou  a cidadanía nas eleccións municipais” porque” despois de dar clase de ética pública a todo o mundo e sentar cátedra agóchanse detrás da letra pequena do Código Ético”.

Pola súa parte o líder local do BNG Rubén Cela insiste en que el dimitiría de estar “nunha situación como a do señor Duarte, en coherencia co que levo defendido e para non causar máis danos a organización”. Con todo, o nacionalista deixou claro que o tenente de alcalde lle parece unha persoa honesta.