A deputada Vázquez Verao responde a Podemos e IU que os inscritos xa decidiron o futuro de En Marea
Lémbralle a Eva Solla que foron as bases as que decidiron que o partido instrumental sirva de paraugas para as mareas locais que queiran sumarse á marca, así como respectar as xa consolidadas.
- IU e Podemos dan por finiquitado o proxecto de En Marea en Galicia
- En Marea: “Aquí decidiremos nós as marcas e as siglas, non Podemos ou IU"
- Podemos, IU e Equo pasan das mareas galegas e pactan pola súa conta ir xuntos coas súas siglas ás eleccións de 2019
Por Europa Press / Redacción | SANTIAGO DE COMPOSTELA | 04/06/2018 | Actualizada ás 16:05
A deputada de En Marea Paula Vázquez Verao respondeu á súa compañeira de grupo parlamentario Eva Solla (Esquerda Unida) que na formación rupturista "deciden os inscritos" e que, neste sentido, xa se aprobou que o partido sirva de paraugas para as mareas locais que queiran sumarse á marca, así como respectar a aquelas xa consolidadas (como a de Santiago, A Coruña ou Ferrol).
Esquerda Unida xulgou que En Marea derivou nun "partido ornamental" e fixo unha defensa pública do acordo marco asinado por Esquerda Unida e Podemos a nivel estatal, xunto con Equo, para fomentar a fórmula da coalición política.
Defendeuno a propia coordinadora de Esquerda Unida, Eva Solla, que é deputada de En Marea, partido que celebrou a súa asemblea fundacional o 30 de xullo de 2016 en Vigo e no que participaron membros desta formación e de Podemos (non a súa secretaria xeral, aínda que si asistiu pola tarde á asemblea).
Na súa fundación, En Marea creouse como partido instrumental de adscrición individual, é dicir, non é unha fronte política no que cada organización participa como tal, senón que hai que participar individualmente nela, como así o tiveron que facer os integrantes da candidatura e agora deputados no Parlamento autonómico.
Con todo, tanto a líder de Podemos Galicia, Carmen Santos, como de Esquerda Unida, Eva Solla, cuestionan a dirección que saíu do último proceso interno e, de feito, cuestionan o funcionamento da organización baixo o liderado de Luís Villares. Precisamente, ambas coincidiron en Madrid o pasado venres no debate da moción de censura contra Mariano Rajoy, pouco antes de que se fixese oficial o acordo marco estatal da formación morada e a federación de esquerdas.
"En En Marea deciden as persoas inscritas, o conxunto da xente. A decisión dese proxecto de unidade popular, e de participación individual, xa foi tomada. En Marea xa decidiu", respondeu este luns Paula Vázquez Verao, membro de Cerna e afín á dirección de Luís Villares.
Neste sentido, Vázquez Verao reitera o que xa adiantou Galicia Confidencial, tras consultar varias fontes: que o futuro de En Marea non se decide en Madrid por Podemos, Izquierda Unida e Equo, e que En Marea manterá a súa propia marca nas eleccións municipais. Ou cando menos iso tentarán os que aínda cren neste proxecto, fronte a este sorte de sublevación iniciada desde Podemos e Izquierda Unida.
