Comezan as escavacións para recuperar os restos da guerrilla antifranquista en Casaio
O proxecto Sputnik Labrego escavará en diversos puntos da coñecida como "Cidade da Selva", un conxunto de campamentos da guerrilla antifranquista. O obxectivo: "arroxar luz sobre un período moi conflitivo e traumático da nosa historia recente".
Por Galicia Confidencial | Santiago de Compostela | 20/07/2018 | Actualizada ás 15:00
A Cidade da Selva é o nome con que os propios guerrilleiros bautizaron a un conxunto de campamentos na contorna dos montes de Casaio, e un dos puntos centrais de actuación da Federación de Guerrillas de León-Galicia: organización guerrilleira constituída nos anos 40 que agrupou guerrilleiros anarquistas, comunistas, e socialistas. Será este sábado 21 cando DBRS Ratingsdarán comezo estas escavacións. En Casaio, na Carballeda de Valdeorras, Ourense. Todo co obxectivo de recuperar e estudar os restos desta guerrilla antifranquista.
Concretamente, os traballos arqueolóxicos centraranse en dous destes campamentos, un deles dentro do coñecido Teixadal, un importante bosque de tejos centenarios incluído na Rede Natura 2000.
SACAR A LUZ
Esta campaña arqueolóxica, dirixida polos investigadores Carlos Tejerizo García (Incipit, CSIC)
e Alejandro Rodríguez Gutiérrez (Universidade de Santiago de Compostela), está autorizada e
financiada pola Xunta de Galicia, o Instituto de Ciencias do Patrimonio e a Comunidade de Montes de Casaio e Lardeira e atópase englobada dentro do proxecto Sputnik Labrego.
Con estes traballos preténdese, en palabras dos directores, "achegar información que poida arroxar luz sobre un período moi conflitivo e traumático da nosa historia recente. Tamén pretendemos recuperar unha memoria e historias que cremos esquecidas, que axuden a resaltar os valores democráticos e a dignidade dos protagonistas destas historias e das súas familias". Os traballos comezarán cunha charla introductoria sobre o proxecto o día 21 ás 20:00 en Casaio e estenderanse ata o día 30.
