Por Galicia Confidencial | Compostela | 05/10/2018 | Actualizada ás 13:26
Antón Trabanca, nome ficticio co que asina un integrante do staff directivo de El Correo Gallego, publicaba este venres dentro da columna “Que din os rumorosos” un comentario no que sementa as dúbidas sobre se “se están a producir pequenas sabotaxes nos telexornais da TVG” por parte de “persoas dispostas a todo”.
“Os reiterados fallos técnicos que se están producindo nos programas informativos: videos que entran cortados, conexións que se producen con retardo, cortes inxustificables de declaracións....parecen demasiados erros para englobalos no cupo dos fallos humanos sen intención”, recollía o artigo de El Correo Gallego.
Unhas críticas que xa tiveron contestación esta mesma mañá por parte do comité Intercentros da CRTVG que lle lembra a este xornal que “aparenta descoñecer o contexto de fonda mudanza tecnolóxica polo proceso de dixitalización que está a acometer a televisión pública estes días”.
O Comité enmarca esta “provocación” no contexto de protesta xeralizado do persoal dos medios públicos, que leva vinte semanas denunciando a manipulación informativa e o desmantelamento da CRTVG a través dos chamados “venres negros”. “Antón Trabanca responde aos intereses de quen, desde a súa posición de poder, non tolera a demanda duns medios públicos independentes e ao servizo de todos os galegos e galegas”, indica.
Por iso, o comité solicitóulle por escrito esta mesma mañá ao director xeral da CRTVG, Alfonso Sánchez Izquierdo, que desminta públicamente “esta grave difamación” por, din, “atentar contra a dignidade dos e das profesionais dos medios públicos de Galiza”.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.