Por E.P. | SANTIAGO DE COMPOSTELA | 24/10/2018 | Actualizada ás 20:03
O actual portavoz municipal do PSOE en Pontevedra, Agustín Fernández, presentou este mércores a súa precandidatura para o proceso de primarias que os socialistas celebrarán para elixir o seu candidato á Alcaldía da cidade. A falta dun día para que finalice o prazo para que outros aspirantes poidan postularse, Agustín Fernández deu o paso ao considerar que a cidade "necesita un goberno sólido, responsable e que pense máis nas persoas que nas beirarrúas".
Na súa intervención, Fernández sinalou que non lle constan posibles rivais e asegurou que non tivo "contacto con ninguén" que lle trasladase tal intención. Pola contra, destacou que foron os militantes, integrantes da executiva e compañeiros do propio grupo municipal socialista os que lle animaron "a dar este paso".
Para Agustín Fernández, o grupo municipal que encabeza está a realizar "un bo traballo" que é "necesario consolidar". "As cousas están a facerse razoablemente ben", aínda que "hai que mellorar e escoitar os cidadáns", engadiu.
Aínda que lle parece "cedo" para avanzar a composición da súa posible candidatura e non sería até a primavera de 2019 cando se configuraría a lista electoral socialista, Fernández apostou por manter "certa coherencia interna e permanencia" dentro do grupo municipal que traslade á cidadanía a "consolidación do traballo" realizado.
Por tanto, o socialista sinalou que "a lóxica é que non haxa excesivos cambios", a expensas de abordar este asunto coa secretaría xeral e o grupo municipal actual, de modo que "se configure unha lista que agrade a todos e, sobre todo, aos cidadáns", sinalou.
PP E BNG
Nunha intervención na que destacou a "discrepancia absoluta" que mantén co seu homólogo do PP local, Agustín Fernández asegurou que a cidade do Lérez necesita "unha pasada pola esquerda" e destacou que o PSOE aspira a "gañar e a gobernar" após as municipais.
Así mesmo, referiuse á acción goberno municipal do Bloque Nacionalista Galego encabezado por Miguel Anxo Fernández Lores para criticar que "nos últimos tres anos" a súa xestión foi "bastante mellorable".
Agustín Fernández destacou o "serio desgaste do BNG", que "non estivo a render á altura doutros mandatos". Precisamente, sobre o rexedor municipal, considerou que cumpriu unha "etapa moi importante e que hai que "agradecerlle o seu labor". Por iso, instouno a "non eternizarse no cargo". "Fan falta caras novas e un revulsivo para ver un impulso novo", apuntou.
A pesar de eludir "predicións a longo prazo" ao cualificar de "moi volátil" o próximo 2019 desde o punto de vista político, o portavoz municipal do PSOE en Pontevedra indicou que as "sensacións e datos" que reflicten as executivas do seu partido apuntan unha "tendencia á mellora" dos últimos resultados electorais.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.