Transvasan "de xeito seguro" o gasóleo do camión envorcado en Rodeiro (Pontevedra)

Unha plataforma foi mobilizada para realizar o transvasamento "de xeito seguro" dos 6.000 litros de gasóleo que transportaba o camión que envorcou este xoves en Rodeiro (Pontevedra). O accidente produciuse por mor de placas de xeo, pero non causou feridos nin danos ambientais.

Así o indicou o 112 Galicia, que relatou que foi outro profesional do transporte quen informou do sinistro pasadas as 8,30 horas deste xoves. Así, alertou ao Centro Integrado de Atención ás Emerxencias (CIAE) mediante unha chamada.

O sinistro tivo lugar moi preto de Rodeiro, na estrada que une esta localidade pontevedresa con Río. No seu relato, o alertante indicou que o condutor non resultara ferido e que non apreciaba fuga do produto que transportaba.

Tras recibir o aviso, o 112 Galicia informou os Bombeiros do Deza, os axentes da Garda Civil de Tráfico, os membros do GES de Lalín e a Protección Civil da localidade, que se desprazaron ata o punto indicado. Unha vez realizados os traballos que descartaron posibles verteduras, ademais de levantar a cisterna, os bombeiros deron por finalizado o seu servizo.

A Garda Civil explicou que a presenza de placas de xeo na calzada provocou a saída de vía e envorco do camión no quilómetro 3 da estrada EP-6201 ao seu paso por Rodeiro.